Innlent

Jörð nötrar á suðvesturhorninu

Hólmfríður Gísladóttir skrifar
Skjálftinn varð 0,9 km suðvestur af Keili, á 5,6 km dýpi.
Skjálftinn varð 0,9 km suðvestur af Keili, á 5,6 km dýpi.

Snarpur jarðskjálfti varð á Reykjanesskaga, 0,9 km suðvestur af Keili og á 5,6 km dýpi, klukkan 01.52. Skjálftinn fannst vel á höfuðborgarsvæðinu og þá heyrðust einnig drunur í aðdraganda hans. 

Að sögn Bjarka Kaldalóns Friis, náttúruvársérfræðings hjá Veðurstofu Íslands, benda frumniðurstöður til þess að skjálftinn hafi verið 3,5 til 3,8 að stærð.

„Þetta er sama svæði og hrinan sem hefur verið í gangi rétt sunnan við Keili og skjálftinn fannst vel á suðvesturhorninu,“ sagði Bjarki þegar Vísir náði tali af honum.

Í gær mældust 700 skjálftar á mælum Veðurstofunnar en að sögn Bjarka hafa 200 skjálftar til viðbótar mælst eftir miðnætti.

En þýðir þetta að ný skjálftahrina sé að hefjast, líkt og í aðdraganda gossins í Fagradalsfjalli?

„Nei, í raun ekki,“ svarar Bjarki. „Og það er enginn órói. Það sést ekkert nýtt á vefmyndavélum; það er enn gos í Fagradalsfjalli en hefur ekkert flætt síðustu viku eða tíu daga. Gosið er ekkert búið og þessi skjálftahrina sem hófst á mánudag getur verið kvika að finna sér leið eða hreyfing á flekaskilunum.

Við verðum bara að sjá hvað gerist.“

Uppfært kl. 02.25:

Nú liggur fyrir að skjálftinn var 3,7 að stærð.

Eldgos og jarðhræringar Eldgos í Fagradalsfjalli Vogar
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið