Erlent

Til­nefna Anders­son sem nýjan for­mann sænskra Jafnaðar­manna

Atli Ísleifsson skrifar
Hin 54 ára Magdalena Andersson hefur gegnt embætti fjármálaráðherra Svíþjóðar síðustu sjö ár.
Hin 54 ára Magdalena Andersson hefur gegnt embætti fjármálaráðherra Svíþjóðar síðustu sjö ár. EPA

Undirbúningsnefnd á vegum sænskra Jafnaðarmanna hefur tilnefnt fjármálaráðherrann Magdalenu Andersson til að verða næsti formaður flokksins. Framundan er landsþing flokksins í byrjun nóvember þar sem arftaki Stefans Löfven forsætisráðherra verður kjörinn.

Miklar líkur eru á að nýr leiðtogi Jafnaðarmannaflokksins verði einnig nýr forsætisráðherra, en samhliða því að láta af formennsku í flokknum mun Löfven hætta sem forsætisráðherra.

Sænska þingið mun þó þurfa að greiða sérstaklega atkvæði um nýjan forsætisráðherra þar sem meirihluti þarf að umbera viðkomandi, það er ekki greiða atkvæði gegn þeim sem þingforseti tilnefnir sem forsætisráðherra. 

Fari svo að Andersson taki við sem forsætisráðherra af Löfven yrði hún fyrsta konan til að gegna embættinu í Svíþjóð. Þingkosningar fara svo fram í landinu haustið 2022.

Andersson segir það mikinn heiður að hafa verið tilnefnd af undirbúningsnefndinni. Á fréttamannafundi flokksins í dag sagði Andersson meðal annars að hún ætli sér að velta hverjum steini þannig að hægt sé að hafa betur í baráttunni gegn skipulagðri glæpastarfsemi í landinu.

Öll 26 flokksfélög Jafnaðarmannaflokksins höfðu þegar lagt til að Andersson yrði næsti formaður.

Hin 54 ára Andersson hefur gegnt embætti fjármálaráðherra Svíþjóðar síðustu sjö ár.


Tengdar fréttir

„Nískasti fjár­mála­ráð­herra ESB“ lík­legastur til að taka við

Stefan Löfven greindi frá því um síðustu helgi hann ætli sér að láta af störfum sem forsætisráðherra Svíþjóðar í haust. Hann muni ekki bjóða sig fram til áframhaldandi formennsku í Jafnaðarmannaflokknum á landsþingi í nóvember. Skiljanlega eru farnar af stað miklar umræður um hver muni taka við formennsku í flokknum og yrði þá í kjörstöðu til að taka einnig við embætti forsætisráðherra landsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×