Erlent

Starfsmenn WHO meðal þeirra sem brutu kynferðislega gegn konum í Lýðveldinu Kongó

Hólmfríður Gísladóttir skrifar
Að minnsta kosti níu konum var nauðgað og tvær þeirra urðu óléttar.
Að minnsta kosti níu konum var nauðgað og tvær þeirra urðu óléttar. Getty/Spencer Platt

Starfsmenn Alþjóðaheilbrigðisstofnunarinnar (WHO) voru meðal 83 starfsmanna hjálparstofnana sem beittu konur og stúlkur kynferðislegri misnotkun í Lýðveldinu Kongó á árunum 2018 til 2020.

Barátta stóð þá yfir gegn ebólu-faraldri í landinu.

Um 50 konur og stúlkur tilkynntu um kynferðisbrot, sem voru framin bæði af innlendum og erlendum hjálparstarfsmönnum. Um var að ræða að minnsta kosti níu nauðganir og tvær konur urðu óléttar í kjölfar ofbeldisins.

Tedros Adhanom Ghebreyesus, framkvæmdastjóri WHO, segir málið „óafsakanlegt“.

Óháð nefnd tók ásakanirnar út og tók meðal annars viðtöl við tugi kvenna sem sögðu að þeim hefðu verið boðin störf í skiptum fyrir kynlíf. Áfengi var borið í aðrar konur, ráðist á sumar á sjúkrahúsum og öðrum nauðgað.

Af 83 hjálparstarfsmönnum sem eru grunaðir um að hafa brotið gegn konum á tímabilinu, var 21 starfsmaður WHO.

Talsmenn stofnunarinnar sögðu að fjórum starfsmönnum sem væru enn við störf hefði verið sagt upp og að gripið yrði til frekari aðgerða. Tedros sagði skýrsluna erfiðan lestur og bað fórnarlömbin afsökunar.

Sagði hann ábyrgðina liggja á sínum herðum og hét því að styðja við fórnarlömb misnotkunar og gera úttekt á innviðum WHO og „menningunni“ innan stofnunarinnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.