Erlent

Fyrrverandi forseti Katalóníu handtekinn á Ítalíu

Hólmfríður Gísladóttir skrifar
Puigdemont á blaðamannafundi í júní þar sem umræðuefnið var friðhelgi hans sem Evrópuþingmanns.
Puigdemont á blaðamannafundi í júní þar sem umræðuefnið var friðhelgi hans sem Evrópuþingmanns. epa/Stephanie Lecocq

Carles Puigdemont, fyrrverandi forseti Katalóníu í útlegð, hefur verið handtekinn á Ítalíu. Stjórnvöld á Spáni hafa sakað hann um uppreisn með því að boða til þjóðaratkvæðagreiðslu um aðskilnað árið 2017, sem dómstólar dæmdu ólöglega.

Puigdemont flúði til Belgíu eftir atkvæðagreiðsluna og situr á Evrópuþinginu.

Samkvæmt BBC beið lögregla eftir honum á Alghero-Fertilia flugvellinum á Sardiníu og verður hann leiddur fyrir dómara innan tíðar. Að sögn lögmanns Puigdemont ferðaðist hann til eyjarinnar til að sækja katalónska hátíð.

Það verður undir dómara komið hvort honum verður sleppt eða hvort hann verður framseldur.

Þjóðaatkvæðagreiðslan markaði vatnaskil í Katalóníu, þar sem stjórnvöld þar lýstu yfir sjálfstæði en stjórnvöld á Spáni brugðust við með því að taka yfir stjórn á svæðinu.

Eftir að Puigdemont og tveir ráðherrar flúðu voru níu aðrir leiðtogar Katalóníu handteknir. Þeir voru hins vegar náðaðir í júní síðastliðnum af forsætisráðherranum Pedro Sánchez.

Dómarinn ítalski þarf að ákveða hvort handtökuskipunin á hendur Puigdemont sé enn í gildi. Pere Aragones, núverandi forseti Katalóníu, hefur fordæmt „ofsóknir“ Spánar á hendur honum en þess ber að geta að Aragones er einnig aðskilnaðarsinni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×