Ellefu menn dæmdir fyrir hópnauðgun og frelsissviptingu

Hallgerður Kolbrún E. Jónsdóttir skrifar 22. september 2021 23:25

Stúlkan sýndi húðflúrin sem glæpamennirnir ristu á hana þegar hún var í haldi þeirra. Skjáskot

Ellefu karlmenn hafa verið dæmdir í tuttugu ára fangelsi hver fyrir að hafa rænt og hópnauðgað marokkóskri unglingsstúlku. Lögmaður stúlkunnar greindi frá þessu í dag en málið hefur vakið mikla reiði í Marokkó.

Khadija Okkarou var aðeins sautján ára þegar ofbeldið átti sér stað en hún greindi frá því í myndbandi sem birtist á netinu árið 2018. Myndbandið vakti mikla athygli á sínum tíma, enda heldur óvenjulegt í landinu sem er mjög íhaldssamt.

Þar greindi hún frá því að meðlimir í „hættulegu glæpagengi“ hafi rænt henni og haldið henni fanginni í tvo mánuði. Á meðan hafi þeir nauðgað og beitt hana grimmu ofbeldi. Í myndbandinu sýndi hún jafnframt ljót „ör eftir sígarettur og húðflúr sem hún sagði mennina hafa skorið í líkama sinn.

Lögmaður Okkarou, Ibrahim Hachane, sagði í samtali við AFP að hinir ákærðu hafi verið sakfelldir fyrir ýmsa liði, þar á meðal mannrán, frelsissviptingu og nauðgun.

Tveir menn til viðbótar voru dæmdir í tveggja ára fangelsi og eitt ár í skilorðsbundnu fangelsi. Þá hafa mennirnir allir verið dæmdir til að greiða Okkarou 200 þúsund dírhöm, eða rúmar 2 milljónir íslenskra króna, í miskabætur.

Hachane sagðist ekki sáttur með dóminn, hann væri of mildur, og nefndi sem dæmi að séu menn dæmdir fyrir smygl sé þyngsta refsing þrjátíu ár. Hachane hyggst áfrýja dómnum.

Marokkó

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.