Viðskipti innlent

Rándýrt að auglýsa í Reykjavík

Snorri Másson skrifar
Auglýsingar frá stjórnmálaflokkum hafa ekki farið framhjá einum einasta manni síðustu daga. Eða hann þyrfti alla vega að hafa komið sér kirfilega fyrir í helli til þess að sleppa við þær.
Auglýsingar frá stjórnmálaflokkum hafa ekki farið framhjá einum einasta manni síðustu daga. Eða hann þyrfti alla vega að hafa komið sér kirfilega fyrir í helli til þess að sleppa við þær. Vísir/Egill

Íslenskir stjórnmálaflokkar hafa keypt auglýsingar á Facebook fyrir rúmlega 24 milljónir króna undanfarið ár. Auglýsingar á samfélagsmiðlum eru þó aðeins brotabrot af útgjöldum flokkanna til markaðssetningar.

Það færist hiti í leikinn í kosningabaráttunni. Facebook og dótturfyrirtæki þess Instagram njóta góðs af en íslenskir fjölmiðlar og skiltaeigendur þó enn frekar.

Miðflokkurinn er helsta eyðsluklóin á Facebook með 3,2 milljónir en fast á hæla þeirra fylgir Flokkur fólksins með rúmar 2,7. Píratar eru áberandi eyðslugrannir og hafa aðeins eytt tæpum 148 þúsund krónum á aðalsíðu sinni í kosningabaráttunni. Flokkurinn hefur þar eytt minna en til dæmis Ásmundur Einar Daðason einn og sér, sem hefur eytt rúmri hálfri milljón á síðasta mánuði.

Ítarlega umfjöllun Stöðvar 2 má sjá hér:

„Við erum auðvitað að sjá stóru flokkana, þessa rótgrónu sem hafa verið lengi í þessu, að þeir eru passasamari. Það má kannski líkja þessu við stórfyrirtæki sem er með skýra stefnu um það hvernig þeir koma öllu út. Á meðan hafa litlu flokkarnir meira um að berjast að koma sér inn og meira að sanna, þeir eru að fara út fyrir kassann og gera eitthvað aðeins öðruvísi, sem er kannski að vekja eftirtekt,“ sagði Sigurður Svansson, einn eigenda auglýsingastofunnar Sahara, kvöldfréttum Stöðvar 2.

Sigurður Svansson auglýsingamaður.Vísir/Egill

Peningar til Facebook og Instagram fara úr landi eins og gefur að skilja, sem er auðvitað ekki óumdeilt. Brúnin ætti þó aðeins að léttast á andstæðingum slíkra fjárútláta þegar litið er til þess, að töluvert meira fé er varið í innlendar auglýsingar.

Gísli Rafn Ólafsson, kosningastjóri Pírata og frambjóðandi í öðru sæti á lista flokksins í Suðvesturkjördæmi, segir meðvitaða ákvörðun að verja aðeins fjórðungi auglýsingafjár flokksins í erlenda samfélagsmiðla, enda sé það ábyrgðarhluti að styðja við íslenska fjölmiðla. Þó séu útgjöld flokksins á Facebook ekki eins lítil og virðist í fyrstu, enda sé þeim dreift á ólíkar síður á vegum Pírata.

Mörg hundruð þúsund krónur fyrir sólarhringinn

Fréttastofan fór á stúfana um bæinn, fletti í dagblöðum og las vefmiðla - og komst að raun um að það er ekki ódýrt að auglýsa eins og flokkarnir gera nú um mundir.

Það eru um 300 strætóskýli í bænum og að birtast þar á mínútufresti kostar um fjögur hundruð þúsund krónur á dag, samkvæmt upplýsingum fréttastofu. Við þetta bætist síðan um 90 þúsund króna vaskur.

Það eru um tuttugu auglýsingaskjáir í bænum og að fara á þá alla á mínútufresti kostar líka um fjögur hundruð þúsund kall á dag.

Píratar verja aðeins 25% af auglýsingafé sínu í samfélagsmiðlaauglýsingar.

Heilsíða í íslensku dagblaði getur kostað um 200 þúsund krónur og svipað gildir um borða á mest lesna vefmiðli landsins, Vísi.

Við þetta bætast svo sjónvarps- og útvarpsauglýsingar og ljóst að veltan er talsverð. Sem betur fer sitja stjórnmálaflokkarnir á digrum sjóðum, sem eru vel að merkja að uppistöðu fjármagnaðir með skattfé. 

Nánar tiltekið sífellt meira skattfé: Framlög úr ríkissjóði til stjórnmálaflokka nema 728 milljónum í ár, þar af fékk Sjálfstæðisflokkurinn 173 milljónir í samræmi við um 24% fylgi. Þessi útgjöld hafa margfaldast á síðustu árum: Fyrir fimm árum námu þau aðeins um 286 milljónum samtals til allra flokka.


Tengdar fréttir

Senu­­þjófar kosninga­bar­­áttunnar

Nú þegar kosningabaráttan fyrir Alþingiskosningar 2021 fer að nálgast sinn hápunkt er ekki úr vegi að horfa yfir sviðið og reyna að glöggva sig á því hvaða frambjóðandi er sá svarti senuþjófur sem hefur náð að sópa til sín mestu af hinni dýrmætu athygli sem allt snýst um á tímum sem þessum. Þrír einstaklingar teljast ótvíræðir sigurvegarar. En óhætt að segja að þeir hafi farið sitthverja leiðina að því marki.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.