Innlent

Ætla að rampa upp Ísland með eitt þúsund römpum

Árni Sæberg skrifar
Haraldur Þorleifsson átti hugmyndina að Römpum upp Reykjavík.
Haraldur Þorleifsson átti hugmyndina að Römpum upp Reykjavík. Vísir/Sigurjón

Verkefnið Römpum upp Reykjavík hefur gengið vonum framar en átakið hefur skilað sér í eitt hundrað römpum sem bæta hjólastólaaðgengi í Reykjavík. Nú hafa aðstandendur verkefnisins ýtt Römpum upp Ísland úr vör en því verkefni er ætlað að byggja eitt þúsund rampa um allt land.

Haraldur Þorleifsson, hugmyndasmiður og helsti styrktaraðili Römpum upp Reykjavík, segir í samtali við Vísi að markmið um að byggja 100 rampa á einu ári hafa tekist á innan við átta mánuðum. Hann þakkar árangurinn góðum móttökum Reykjavíkurborgar og góðum styrktaraðilum.

„Borgin tók þetta bara strax í fangið og bjó til teymi hjá sér og breytti ferlum þannig að þetta gekk mjög hratt. Við gátum komið inn með umsóknir og þær voru afgreiddar oft bara samdægurs,“ segir Haraldur.

Ætla að miða við kjörtímabilið

„Við ætlum að reyna að gera þúsund rampa næst og við ætlum að miða við kjörtímabilið og taka 250 rampa á ári næstu fjögur árin,“ segir Haraldur.

Hann segir að kynning á verkefninu sé þegar hafin og búið sé að tala við margt fólk. Því sé hann bjartsýnn um að markmiðið náist. 

„Við ætlum að taka staði út um allt land og byrja framkvæmdir strax í vor,“ segir Haraldur.

Næst á dagskrá sé að hefja samtal við sveitarfélög landsins og athuga hvort þau vilji vera með í verkefninu. „Vonandi verður mjög breiður áhugi þar og ef allir vilja vera með getum við byrjað. Það er náttúrulega aðeins auðveldara að vinna í stærri sveitarfélögum en það er mjög mikilvægt að þetta verði dreift um landið,“ segir hann.

Aðgengi sé upp og ofan

Haraldur segir að aðgengi sé almennt betra í nýrri bæjarfélögum þó nokkuð beri á því að svindlað sé á reglugerðum sem kveði á um að gott aðgengi sé tryggt. „Í eldri bæjarfélögum getur þetta verið erfitt og margt sem þarf að laga,“ segir hann.

Þó hafi reynslan af byggingu rampa í Reykjavík sýnt fram á að það sé oftast auðvelt að bæta aðgengi. Þegar verkefnið hafi verið komið almennilega í gang hafi tekist að byggja tvo ef ekki þrjá rampa á degi hverjum.

„Ég held að eftir fjögur ár þegar við höfum náð að klára þessa þúsund rampa verði Ísland, að þessu leiti, mjög aðgengilegt land. Þótt það sé ýmislegt annað sem þurfi að laga,“ segir Haraldur að lokum.


Tengdar fréttir

Blásið til sóknar í aðgengismálum hreyfihamlaðra

Blásið var til sóknar í úrbótum fyrir aðgengi fólks í hjólastólum að fyrirtækjum og stofnunum með forseta Íslands, forsætisráðherra, borgarstjóra og fórráðamönnum samtaka og fyrirtækja í Iðnó í dag. Stefnt er að samhentu átaki við byggingu hundrað rampa í Reykjavík á einu ári.

Hafa reist fimm­tíu rampa á tveimur mánuðum

Verkefnið Römpum upp Reykjavík var sett af stað þann 11. mars síðastliðinn. Markmiðið með verkefninu er að koma upp hundrað hjólastólarömpum í Reykjavík. Nú tveimur mánuðum síðar hafa fimmtíu rampar verið reistir.

Byrja í elstu húsunum þar sem aðgengið er verst

Verkefninu Römpum upp Reykjavík var hrundið af stað í dag en markmiðið er að koma fyrir 100 römpum í Reykjavík fyrir fólk á hjólastólum eins fljótt og auðið er. Ríkisstjórnin hefur samþykkt að veita þremur milljónum króna í styrk til Aðgengissjóðs Reykjavíkur, sem heldur utan um verkefnið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.