Sam­tök stærstu knatt­spyrnu­fé­laga landsins vilja að hlut­eig­andi axli á­byrgð

Þetta kemur fram í tölvupósti samtakanna til formanna knattspyrnufélaga sem RÚV hefur undir höndum. Þar segir að stjórn ÍTF hafi fundað um málið í allan dag og verið sé „að afla upplýsinga um málefni stjórnar KSÍ.“

Mikið gengur á innan knattspyrnuhreyfingarinnar eftir að Þórhildur Gyða Arnarsdóttir steig fram og greindi frá því að leikmaður karlalandsliðsins hafi brotið á henni inn á skemmtistað árið 2017.

Þórhildur lagði fram kæru en málalyktirnar urðu þær að leikmaðurinn játaði brot sín og greiddi henni miskabætur. Hún hafði áður hafnað boði um þagnarskyldusamning gegn peningagreiðslu. Þórhildur ákvað að greina frá málinu eftir að Guðni Bergs­son, formaður KSÍ, full­yrti í Kastljósi að sam­band­inu hefði aldrei borist form­leg kvört­un vegna kyn­ferðisof­beld­is af hendi landsliðsmanns. Guðni sagði degi síðar að hann hefði misminnt.

Lítið viljað tjá sig 

Sannkallaður maraþonfundur var hjá stjórn KSÍ um ofbeldismál innan sambandsins í dag sem stóð með hléum frá hádegi fram til kvölds. Verður fundarhöldum haldið áfram klukkan tíu í fyrramálið.

Í kjölfarið hyggst stjórn Íslensks toppfótbolta boða til fundar um hádegisbil á morgun til að fara yfir stöðu mála. Á næstu dögum er svo reiknað með því að stjórnin funda með formönnum knattspyrnufélaga þar sem þetta verði rætt enn frekar.

„Það er skoðun stjórnar ÍTF að hluteigendur að málinu eigi að axla ábyrgð,“ segir í stuttri orðsendingu samtakanna til formanna knattspyrnufélaga sem vísað er til í frétt RÚV. Ekki er farið nánar út í það hvort verið sé að kalla eftir breytingum á stjórnendateymi KSÍ. 

„ÍTF mun ekki tjá sig, nema almennt þar til eftir fund formanna,“ segir enn fremur í póstinum en Vísir hefur árangurslaust leitast við að fá viðbrögð frá formanni ÍTF og öðrum stjórnarmeðlimum í kvöld.

Guðni Bergsson, formaður KSÍ, hefur ekki viljað tjá sig við fjölmiðla í dag en hann sagði að von væri á yfirlýsingu frá stjórn KSÍ í kvöld eða á morgun.

Kalla eftir afsögn stjórnarinnar

Þórhildur sagði í kvöldfréttum Stöðvar 2 í kvöld að hún vissi til þess að minnst sex núverandi eða fyrrverandi landsliðsmenn í fótbolta hafi verið sakaðir um ofbeldi. Bæði hún og Hanna Björg Vilhjálmsdóttir, kynjafræðingur og formaður jafnréttisnefndar Kennarasambands Íslands, hafa kallað eftir afsögn stjórnarmanna KSÍ. 

Þetta er ekki í fyrsta sinn sem liðsmenn karlalandsliðsins eru sakaðir um ofbeldisbrot og telur Þórhildur mögulegt að fleiri konur eigi eftir að stíga fram í kjölfarið. Þær séu líklega alltof margar sem hafi orðið fyrir barðinu á ákveðnum leikmönnum landsliðsins.

Horfa má á viðtal við Þórhildi í spilaranum hér fyrir neðan.