Katrín segir ekkert eiga að hindra kosningar

Sunna Sæmundsdóttir skrifar 5. ágúst 2021 21:01

Ríkisstjórnin á Bessastöðum í dag. vísir/Sigurjón

Að óbreyttu var síðasti ríkisráðsfundur ríkisstjórnarinnar á Bessastöðum í dag þar sem farið var yfir lagatillögur sem ráðherrar lögðu fram á liðnu ári.

Rúmar sjö vikur eru nú til kosninga og Katrín Jakobsdóttir, forsætisráðherra, segir gert ráð fyrir að þær fari fram á settum tíma þrátt fyrir stöðu faraldursins.

„Ég minni á að hér fóru fram forsetakosningar í fyrra þar sem koma þurfti til móts við verulegan hóp sem kaus í sóttkví. Þannig við erum ekki með öllu reynslulaus í að kjósa þótt heimsfaraldur gangi yfir,“ segir Katrín.

Enn á eftir að rjúfa þing og boða formlega til kosninga sem eiga að fara fram 25. september. Þegar það hefur verið gert getur atkvæðagreiðsla utan kjörfundar hafist.

Katrín segir unnt að rjúfa þing og auglýsa settan kjördag frá og með 12. ágúst. Miðað við stöðu faraldursins í dag má gera má ráð fyrir að fjöldi fólks þurfi að greiða atkvæði utan kjörfundar þar sem þúsundir eru í sóttkví eða einangrun.

Hún telur hægt að tryggja sóttvarnir á kjörstað. „Ég held að við munum bara bregðast við því og það hefur hið minnsta ekkert gerst sem breytir þeirri ákvörðun að það stendur til að kjósa 25. september.“

Ríkisstjórn Katrínar Jakobsdóttur Alþingiskosningar 2021 Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.