Erlent

Búið að bera kennsl á þann síðasta sem dó

Samúel Karl Ólason skrifar
Ekki er talið að fleiri hafi verið í byggingunni en áfram verður leitað í brakinu.
Ekki er talið að fleiri hafi verið í byggingunni en áfram verður leitað í brakinu. AP/Lynne Sladky

Búið er að bera kennsl á þann síðasta af 98 sem dóu þegar hluti fjölbýlishúss hrundi í bænum Surfside á Flórída þann 24. júní síðastliðinn. Estelle Hedaya var sú síðasta sem var á lista yfir þá sem hefur verið saknað frá því húsið hrundi.

Daniella Levine Cava, borgarstjóri Miami-Dade, lýsti þessu yfir í dag og er ekki talið að fleiri hafi verið í húsinu. Áfram verður þó leitað í rústunum sem hafa að mestu verið fluttar í vöruskemmu.

Cava lofaði björgunarsveitar- og slökkviliðsmenn sem tóku þátt í leitinni og það starf sem þeir unnu á 33 dögum. AP fréttaveitan segir þá hafa unnið í tólf tíma vöktum og hefur eftir ráðamönnum að starfið hafi tekið á tilfinningar þeirra.

Frá blaðamannafundi Cava í dag.

Hluti hins tólf hæða byggingar, Champlain Towers South, hrundi um miðja nótt 24. júní. Allir nema einn dóu þegar húsið hrundi. Þessi eini dó á sjúkrahúsi.

Sérfræðingar segja bygginguna mögulega hafa verið gallaða en eigendur hússins vissu af því að þörf var á umfangsmiklum og kostnaðarsömum viðgerðum en húsið var byggt árið 1981.

Sjá einnig: Byggingarfulltrúi sagði húsið sem hrundi í „mjög góðu ástandi“

Hér má sjá myndband af því þegar húsið hrundi.

Í grein AP segir óljóst hvað eigi að verða um lóðina. Dómari sem er með nokkur dómsmál vegna hrunsins á sinni könnu vill að lóðin verði seld. Talið er að verðið gæti farið yfir hundrað milljónir dala. Einhverjir eigendur vilja endurreisa húsið og aðrir vilja að reistur verði minnisvarði á lóðinni.

Hér má hlusta á símtöl Neyðarlínunnar eftir að húsið hrundi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.