Körfubolti

NBA dagsins: Gömlu hetjurnar mættu og sáu Hirtina jafna úrslitaeinvígið

Ingvi Þór Sæmundsson skrifar
Kareem Abdul-Jabbar og Oscar Robertson veifa til áhorfenda á leik Milwaukee Bucks og Phoenix Suns í Fiserv Forum í nótt.
Kareem Abdul-Jabbar og Oscar Robertson veifa til áhorfenda á leik Milwaukee Bucks og Phoenix Suns í Fiserv Forum í nótt. getty/Stacy Revere

Leikmenn úr eina meistaraliði Milwaukee Bucks fylgdust með gamla liðinu sínu vinna Phoenix Suns í nótt, 109-103, og jafna þar með metin í úrslitaeinvíginu um NBA-meistaratitilinn.

Khris Middleton skoraði fjörutíu stig í leiknum í nótt, þar af tíu stig í röð undir lok leiks. Giannis Antetokounmpo var með 26 stig, fjórtán fráköst og átta stoðsendingar fyrir Milwaukee sem vann lokaleikhlutann með tólf stigum, 33-21.

Milwaukee hefur unnið tvo leiki í röð eftir að Phoenix komst í 2-0 í úrslitaeinvíginu. Næsti leikur fer fram í Phoenix aðfaranótt sunnudags.

Klippa: NBA dagsins: 15. júlí

Þetta er aðeins í þriðja sinn og í fyrsta sinn síðan 1974 sem Milwaukee er í úrslitum NBA. Hirtirnir urðu meistarar 1971 og töpuðu svo fyrir Boston Celtics í oddaleik í úrslitunum þremur árum seinna.

Aðalmennirnir í liði Milwaukee á þessum gullaldarárum voru mættir í Fiserv Forum höllina í nótt og fylgdust með gamla liðinu sínu.

Þetta voru þeir Kareem Abdul-Jabbar, Oscar Robertson og Bob Dandridge. Þeir tveir fyrstnefndu sátu saman og fengu veglegt lófaklapp þegar þeir voru kynntir í fyrri hálfleik. Treyjur þremenninganna (nr. 1, 10 og 33) hanga uppi í rjáfri í Fiserv Forum.

Kareem var valinn besti leikmaður úrslitanna 1971 þegar Milwaukee vann Baltimore Bullets, 4-0. Í úrslitaeinvíginu var Kareem með 27,0 stig, 18,5 fráköst og 2,8 stoðsendingar að meðaltali í leik.

Robertson, sem var þá kominn á efri ár í körfuboltanum, skoraði 23,5 stig, tók 5,0 fráköst og gaf 9,5 stoðsendingar að meðaltali í leik í úrslitaeinvíginu og Dandridge var með 20,3 stig, 9,8 fráköst og 3,3 stoðsendingar.

Milwaukee á einn heimaleik eftir á tímabilinu en sjötti leikurinn í úrslitaeinvíginu fer fram þar í borg aðfaranótt miðvikudags. Ef þarf verður oddaleikurinn svo í Phoenix aðfaranótt föstudags. 

Í spilaranum hér fyrir ofan má sjá brot úr leik Milwaukee og Phoenix í nótt.


NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.

NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.