Innlent

Ferðaþjónustan að lifna við: „Það eru allir eins og beljur á vorin“

Samúel Karl Ólason skrifar
Pétur Gauti hefur starfað sem leiðsögumaður í tuttugu ár.
Pétur Gauti hefur starfað sem leiðsögumaður í tuttugu ár. Vísir/Lillý

Ferðaþjónustan á Íslandi er að lifna við þó enn séu tiltölulega fáir ferðamenn á ferð og flugi um landið. Pétur Gauti Valgeirsson, fyrrverandi formaður Leiðsagnar stéttarfélags leiðsögumanna, segir umsvifin aukast mun hraðar en hann hafi talið.

Hann líkir fólki í ferðaþjónustu og ferðamönnum við beljur á vorin. Allir séu hæstánægðir með að komast af stað á nýjan leik.

„Maður sér það líka á ferðamönnunum. Þeir eru glaðir með að geta verið hérna grímulausir, þurfa ekki að spritta út í eitt og allt það í kringum Covid. Fólk er voða glatt með að komast úr sínum bás og geta farið í ferðalag til útlanda.“

Pétur hefur verið í leiðsögumannabransanum í tuttugu ár en hann starfar fyrir GJ Travel, eða Guðmund Jónasson Travel. Hann er á hringferð um landið með þrjátíu manna hóp frá Bandaríkjunum og var í Ásbyrgi þegar blaðamaður náði tali af honum í gær.

Hann segir gaman að hitta kollega aftur eftir það sem gengið hefur á.

Ástandið sé þó enn svolítið skrítið. Langflestir séu í sinni fyrstu ferð og enn eigi eftir að opna víða. Hann sé með þrjátíu hóp og hafi ekki séð aðra með fleiri en það. Hins vegar búist menn við því að allt verði fullt í næstu ferðum.

„Þetta er að fara miklu hraðar af stað en ég hélt. Ég hélt ég væri þokkalega raunsær með að tala um ágúst eða kannski september. Þetta er gerast hraðar en það,“ segir Pétur.

Ekki allir í góðri stöðu

Hann segir þó ekki alla í ferðaþjónustunni í góðri stöðu. Hann hafi heyrt af leiðsögumanni sem leitaði með hóp til veitingastaðar út á landi en hafi fengið svör að viðkomandi hefði ekki efni á að kaupa mat til að elda fyrir hópinn.

„Menn eru bara búnir með allt rekstrarfé og sparifé,“ segir Pétur. Hann segir það eiga við einhverja en hann sjái einnig að aðrir hafi gert endurbætur.

Pétur segist einnig hafa heyrt af vandræðum við að ráða fólk í ferðaþjónustustörf. Það hafi gengið erfiðlega og einhverjir hafi ekki viljað ráða sig í störf sem séu ótrygg. Faraldurinn gæti farið aftur af stað.

Á ferð með skemmtilegan hóp frá Bandaríkjunum

Hópurinn sem Pétur ferðast nú með er frá Bandaríkjunum. Hann segir fólkið hafa útskrifast úr sama háskólanum en á mismunandi árum. Aldur fólks í hópnum sé á bilinu tuttugu til 84 ára. Með í hópnum eru prófessorar í jarðfræði og sagnfræði og haldnir hafi verið fyrirlestrar. Einn sé til að mynda að lesa Njálu fyrir hópinn.

Í hópnum séu systur, kennari með gömlum nemendum sínum og þrjár kynslóðir einnar fjölskyldu.

Ferðamenn í Ásbyrgi.Vísir/Lillý

„Þetta er skemmtilegt fólk og það hefur mjög mikinn áhuga og spyr rosa mikið af spurningum,“ segir Pétur. „Þannig vill maður hafa það.“

Fækkaði sífelt í síðustu ferðinn í fyrra

Pétur fór síðast í hópferð sem þessa í mars í fyrra en sú ferð var vægast sagt óhefðbundin.

„Ég átti að fara með tuttugu en þau komu ekki nema átta. Þrír þurftu svo að fara snemma því það var verið að loka landinu þeirra. Svo þurftu tveir aðrir að fara og ég endaði með einn síðasta daginn,“ segir Pétur.

Hann segir fólkið hafa séð fram á það að komast mögulega ekki aftur til síns heima.

Stór hluti þeirra ferðamanna sem eru að koma til Íslands eru frá Bandaríkjunum. Það segir Pétur gott, því þeir séu kaupglaðir eins og við Íslendingar og skilji mikið eftir sig.

Pétur ferðaðist um með nýgiftum hjónum frá Bandaríkjunum í síðasta mánuði. Þegar þau hafi verið að leita að stað til að heimsækja í brúðkaupsferð hafi ríkisstjórn Íslands tilkynnt að tekið yrði á móti fólki með alþjóðleg bólusetningarskírteini.

„Þá bara bókuðu þau ferð til Íslands og vissu ekki neitt um Ísland,“ segir Pétur. Hann segir brúðgumann hafa átt afmæli síðasta daginn þeirra á Íslandi. Þann dag hafi þau byrjað í Reynisfjöru, farið svo í sleðaferð upp á Mýrdalsjökul og lokið deginum með því að ganga að eldgosinu á Reykjanesi.

„Hann á aldrei eftir að toppa þennan afmælisdag.“

Uppfært: Upprunalega stóð í fréttinni að Pétur Gauti væri formaður Leiðsagnar. Það er ekki rétt og hefur verið leiðrétt. Hann er fyrrverandi formaður en núverandi formaður félagsins er Friðrik Rafnsson.


Tengdar fréttir

Vara við því að óbólu­sett börn ferðist til út­landa

Margir Íslendingar stefna á ferðalög í sumar, bæði innanlands og utan, og er fólk farið að flykkjast út á Keflavíkurflugvöll til að halda í frí til útlanda. Einhverjir hafa þó velt fyrir sér ágæti þess að taka börnin með í frí en börn undir 16 ára aldri hafa flest hver ekki verið bólusett þó svo að fullorðna fólkið hafi nær allt verið það.

Stefna á Íslandsför þrátt fyrir smit

Kórónuveirusmit greindist í röðum írska liðsins Sligo Rovers sem mætir FH í evrópsku Sambandsdeildinni á fimmtudag. Aðrir leikmenn liðsins bíða eftir niðurstöðu úr sýnatöku.

Fyrsta Chi­cago-vélin lenti á Kefla­víkur­flug­velli

Bandaríska flugfélagið United Airlines hóf í dag í fyrsta sinn beint flug milli Keflavíkurflugvallar og Chicago. Þetta er í fyrsta sinn sem United býður upp á beint flug milli Íslands og Chicago en bandarískt flugfélag hefur ekki áður boðið upp á beint flug á þessari leið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×