Erlent

Leita áhorfanda sem olli stórum árekstri á Tour de France

Kjartan Kjartansson skrifar
Gulklædd konan hélt á skilti og hallaði sér í veg fyrir hjólreiðagarpana. Hún olli miklum árekstri með athæfi sínu og verður kærð náist til hennar.
Gulklædd konan hélt á skilti og hallaði sér í veg fyrir hjólreiðagarpana. Hún olli miklum árekstri með athæfi sínu og verður kærð náist til hennar. Skjáskot

Franska lögreglan leitar nú að kvenkyns áhorfanda sem olli meiriháttar árekstri fjölda keppenda í fyrsta áfanga Tour de France-hjólreiðakeppninnar í gær. Áhorfandinn hélt á skilti og hallaði sér í veg fyrir hjólreiðagarpana.

Sakamálarannsókn er hafin á árekstrinum og hyggst lögreglan kæra konuna fyrir að hunsa öryggisreglur vísvitandi og að valda líkamstjóni.

Myndbönd af atvikinu hafa farið sem eldur í sinu um fjölmiðla og samfélagsmiðla um allan heim. Það átti sér stað þegar hjólreiðamennirnir brunuðu í gegnum Finistere-hérað í Bretagne á Norður-Frakklandi.

Konan virtist halla sér inn á veginn og í veg fyrir Tony Martin, þýskan keppanda, þannig að hann rakst á skiltið sem hún hélt á og féll í jörðina. Fjöldi keppinauta hans féll í öngþveitinu í kjölfarið.

Á skiltinu stóð „afi og amma“ á þýsku. Konan horfði í áttina frá hjólreiðamönnunum og virtist ekki sjá þá nálgast, að sögn breska ríkisútvarpsins BBC. Lögreglan segir að konan hafi flúið vettvang eftir áreksturinn.

Forsvarsmenn keppninnar segjast ætla að stefna konunni vegna árekstursins. Hvöttu þeir áhorfendur til þess að virða öryggi keppendanna og hætta ekki öllu til þess að taka mynd eða komast í sjónvarpið.

Frakkland Hjólreiðar Frakklandshjólreiðarnar
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið