Fjárfesti fermingarpeningunum í listaverk og sér ekki eftir því í dag

Sigurður er einungis 23 ára gamall en hefur þrátt fyrir ungan aldur sprengt utan af sér heila íbúð sem hann nýtir bæði sem vinnustofu og sitt eigið listasafn. Ísland í dag heimsótti Sigurð á dögunum.

„Listaverkasöfnunin byrjaði um svipað leyti og ég fór að halda mínar eigin sýningar sem myndlistarmaður, þá þrettán ára gamall en sköpunin hefur alltaf verið í kringum mig,“ segir Sigurður. Hann var aðeins fjögurra ára gamall þegar hann stofnaði sitt eigið smíðaverkstæði við heimili sitt í Vesturbænum.

„Svo um sjö ára aldur þá fór ég að hafa áhuga á myndlist.“

Sigurður leggur í dag stund á nám í myndlist við konunglegu lista akademíuna í den Hag í Hollandi en kom heim á dögunum til að njóta íslenska sumarsins og skipuleggja stóra myndlistarsýningu sem hann hyggst halda hér heima á næsta ári. Rætt var við Sigurð um brennandi áhuga hans á myndlistinni, listaverkasafnið og hans eigin verk en þau hafa verið að seljast eins og heitar lummur á undanförnum árum. Hægt er að horfa á innslagið í spilaranum hér fyrir neðan.

Vinirnir keyptu síma og leikjatölvur

Sigurður segist ekki geta skýrt nákvæmlega hvaðan hann sem sjö ára drengur fékk þetta óvenjulega áhugamál en hann segir meðlimi fjölskyldu sinnar ekki vera sérstaka myndlistarspekúlanta. Hann nefnir þó sérstaklega þessa fyrstu sýningu sem hann sótti sjö ára gamall þegar hann sá verk Ólafs Elíassonar í Hafnarhúsi í Reykjavík. Þar segist Sigurður hafa verið slegin einhverjum töfrum sem höfðu mikil áhrif á hann og kveiktu áhuga hans á því að verða sjálfur myndlistarmaður.

Fyrstu listaverkin keypti hann fyrir fermingarpeningana sína.

„Sumir tóku peningana og keyptu Playstation tölvur og iPhone síma en ég ákvað frekar að velja mér listaverk og sé ekki eftir því í dag.“

Sigurður sem fyrr segir komið sér upp alveg ævintýralegu safni af verkum eftir marga af þekktustu myndlistarmönnum þjóðarinnar. Hann hefur verið svolítið í því að kaupa og selja en segist þó hafa þá reglu að selja engin verk eftir núlifandi listamenn.

„Flest öll þau verk sem að ég kaupi vil ég eiga og helst bara vil ég leyfa erfingjum mínum að eignast seinna meir.“

Fertugur við fermingu

Sigurður segist halda að verkin í safninu hans telji hátt í tvö hundruð myndir þó hann sé ekki með töluna alveg nákvæmlega á hreinu. Þar af eru mörg gríðarlega verðmæt verk eftir eftirsótta listamenn en Sigurður segist síður vilja ræða einhverjar upphæðir í því samhengi en það er alveg ljóst að við erum hér að ræða um talsvert dýrt áhugamál.

Hann á til dæmis verk eftir Kristján Davíðsson, Kjarval, Erró, Megas, Ólaf Elíasson og svona mætti lengi telja. Sigurður segist fyrst og fremst vera myndlistarmaður sjálfur þó að söfnunaráráttan hafi einnig verið fyrirferðarmikil. Hann hefur haldið fjölda einkasýninga frá þrettán ára aldri og segist aldrei hafa verið feiminn við að leggja sig og sín verk fram en þau hafa eðlilega þróast mikið frá fyrstu sýningunni sem haldin var fyrir tíu árum síðan.

„Ég hef stundum sagt það að mín örlög hafa svolítið verið, fertugur við fermingu.“

Nýtir öll tækifæri til að tala um myndlist

Sigurður hefur vakið sérstaka athygli fyrir seríu af myndum þar sem hann skeytir saman manneskjum og dýrum en Bjarni Benediktsson sagði einmitt frá því á Facebook síðu sinni að hann hefði fengið eina slíka mynd í fimmtugsafmælisgjöf í fyrra. Þar má í raun greina sjálfan fjármálaráðherrann fyrir framan ráðuneyti sitt með höfuðið af hundinum Bó sem er einmitt hundur Bjarna Benediktssonar.

Sigurður segist leggja áherslu á að vera aðgengilegur í sinni myndlist enda vill hann að verkin sín nái til sem flestra. Hann segist líka vera ötull talsmaður listarinnar út á við og að hann reyni að nýta hvert tækifæri til að ræða myndlist á meðal fólks sem kannski öllu jafna hugsar ekki mikið um hana.

Sem fyrr segir hefur Sigurður nú þegar sprengt utan af sér húsnæðið þar sem hann geymir verk sín og vinnustofu en hann vinnur nú að því að stækka við sig til að geta komið öllum myndunum fyrir svo þær geti verið aðgengilegar sem flestum. Sigurði þykir nefnilega fátt skemmtilegra en að taka á móti gestum til að ræða um verk sín og annara og býður hann fólki að hafa samband við sig beint til að panta tíma í heimsókn hjá honum á Háaleitisbrautina.