Um þriðjungur smitaðra á Seychelleseyjum fullbólusettur

Hólmfríður Gísladóttir skrifar 12. maí 2021 10:58

Alls hafa 8.200 manns greinst með kórónaveiruna á Seychelleseyjum en íbúar eru um 100 þúsund.

Alþjóðaheilbrigðisstofnunin vinnur nú að því að fara yfir gögn frá Seychelleseyjum, þar sem ríflega þriðjungur þeirra sem hefur greinst með Covid-19 síðustu vikur hefur verið fullbólusettur.

Talsmenn WHO og heilbrigðisráðuneytis Seychelleseyja ítrekuðu í gær að meirihluti þeirra sem greindist jákvæður hefði ekki verið bólusettur eða aðeins fengið einn skammt af bóluefni og að allir þeirra sem hefðu veikst alvarlega eða dáið hefðu verið óbólusettir.

Talsmaður WHO sagðist hins vegar fylgjast vel með þróun mála í eyríkinu, þar sem íbúar eru um hundrað þúsund talsins og um hundrað greinast á dag þrátt fyrir að bólusetningar hafi gengið vel.

Meðalfjöldi greindra á viku hækkaði úr 120 í 314 fyrstu vikuna í maí og um 37 prósent greindra reyndust hafa verið fullbólusettir. Tveir þriðju allra greindru smituðust eftir nánd við smitaðan einstakling.

Hingað til hafa 57 prósent fullbólusettra á Seychelleseyjum fengið bóluefnið frá kínverska framleiðandanum Sinopharm en 43 prósent bóluefnið frá AstraZeneca. Nærri 60 prósent landsmanna hafa fengið báða skammta.

Um 8.200 hafa greinst með Covid-19 á eyjunum frá upphafi faraldursins en smitum hefur fjölgað síðustu misseri. WHO hefur sagt að bólusetningar muni ekki koma fullkomlega í veg fyrir smit, heldur verði áfram að sinna sóttvörnum á borð við handaþvott og grímunotkun.

Faraldur kórónuveiru (COVID-19) Bólusetningar Seychelleseyjar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.