Skorar á ríkis­stjórnina að opna augun eftir um­fjöllun Kompáss

„Við í Samfylkingunni höfum margbent á það á kjörtímabilinu að auka þurfi fjárveitingar til almennrar löggæslu enda hefur lögreglumönnum fækkað mikið þrátt fyrir aukin og flóknari verkefni,“ sagði Helga Vala Helgadóttir, á Alþingi í dag.

Hún minnti ríkisstjórnina á að í stjórnarsáttmála hennar sé öflug löggæsla ein af forsendum þess að öryggi borgara sé tryggt. Helga Vala er þó á því að ríkisstjórnin hafi sofnað á verðinum gagnvart því markmiði.

Kompás birti nú í vikunni umfjöllun um skipulagða glæpastarfsemi og ógnina af þeim í tveimur hlutum á Vísi. Yfirlögregluþjónar hjá lögreglunni segja skipulagða glæpastarfsemi eina mestu ógn sem steðjar að íslensku samfélaginu. Rætt er við framkvæmdastjóra Samtaka fjármálafyrirtækja sem segir glæpahópa hafa svikið hundruð milljóna úr tryggingafélögum. Þá er einnig rætt við settan skattrannsóknastjóra sem segir skipulagða glæpahópa sem misnota skattkerfið til rannsóknar hjá embættinu. Milljörðum sé komið undan.

Einnig er tekið viðtal við Þórönnu Helgu Gunnarsdóttur, ekkju Armando Beqirai sem var myrtur fyrir utan heimili sitt í Rauðagerði í febrúar. Þóranna gagnrýnir að lögreglan hafi ekki aðhafst nóg þrátt fyrir að hafa vitað af því að maðurinn, sem gengist hefur verið morðinu á eiginmanni hennar, hafi verið vopnaður 22 kalíbera skammbyssu um þremur vikum fyrir morðið. Um er að ræða sama skotvopn og hann notaði til að myrða eiginmann hennar.

Viðtalið má sjá hér.

Haft er eftir lögreglu í Kompás að hún hafi brugðist við með því að leita að skammbyssunni en hún ekki fundist. Lögreglu hafi tíma og mannafla til að fylgja málinu betur eftir.

Helga Vala gagnrýndi á Alþingi að lögreglan bæri við fjárskorti þegar kæmi að þessu atriði og þar væri við ríkisstjórnina að sakast.

Þá benti Helga Vala á orð setts skattrannsóknastjóra sem segir í Kompás að skipulagðir glæpir gerist fyrir framan nef embættisins.

„En að embættið hafi án árangurs kallaði eftir úrræðum til að geta brugðist hraðar við grun um að verið sé að misnota skattkerfið til að koma illa fengnu fé undan.

Helga Vala sagði ríkisstjórnina hafa brugðist þegar kemur að því að tryggja öryggi borgaranna.

„Og berjast gegn skipulögðum glæpum og er það í besta falli kæruleysi en í versta falli afglöp ríkisstjórnarinnar. Þetta varðar mannslíf, öryggi borgaranna og heilbrigt samfélag. Ég skora á ríkisstjórnina að opna augun og bregðast við áður en það er um seinan,“ sagði Helga Vala en í Kompás segist lögreglan óttast að lenda undir í baráttu við skipulagða glæpahópa, sér í lagi ef albanska mafían fer að láta til sín taka hér á landi.

Sérstakt átak gegn glæpastarfsemi

Birgir Ármansson, þingmaður Sjálfstæðisflokksins, steig einnig í pontu og sagði fulla ástæðu til að taka undir viðvörunarorð Helgu um skipulagða glæpastarfsemi. 

„Það er rétt sem hefur komið fram hjá lögregluyfirvöldum í landinu að skipulögð glæpastarfsemi er vaxandi vandamál og ein af helstu ógnum sem við okkur blasir á þessum tímum. Hins vegar held ég að það sé rétt að halda því til haga að það er ekki, eins og þingmaður lét í veðri vaka, að ríkisstjórn hefði setið aðgerðalaus og látið þessa þróun eiga sér stað án þess að bregðast við með einhverjum hætti. Það er langt því frá" sagði Birgir. 

Hann sagði málaflokkinn hafa verið til umfjöllunar hjá allsherjar- og menntamálanefnd. Þar hafi komið fram að á undanförnum misserum hefur, vegna hættunnar af skipulagðri glæpastarfsemi, verið farið í sérstakt átak til að auka samvinnu lögregluembætta og annarra yfirvalda sem fást við rannsóknir á þessum málum. 

„Það hefur verið varið auknu fjármagni í rannsóknir á þessu sviði, stórauknu fjármagni bæði með sérstökum fjárveitingum en eins með því að nýta fé sem hugsanlega hefur ekki nýst annars staðar í þessum tilgangi þannig að það hefur verið verulega aukið í að þessu leyti," sagði Birgir. 

Áslaug Arna Sigurbjörnsdóttir dómsmálaráðherra tilkynnti fyrr í vetur að 350 milljónum hefði verið varið í löggæslusjóð til að berjast gegn skipulagðri glæpastarfsemi. Þá hefði sérstakur stýrihópur verið stofnaður til að vinna að samhæfingu aðgerða á milli lögregluembætta og stofnana.