Stemning á forsýningu Arons Can í Egilshöll

Sylvía Rut Sigfúsdóttir skrifar 30. apríl 2021 09:46

Boðsgestir fengu að sjá sérstaka forsýningu á nýju myndbandi Arons Can í Sambíóunum Egilshöll í gær með öllum þeim sem komu að gerð myndbandsins. Það verður svo frumsýnt í hádeginu í dag. Gunnhildur Helga Katrínardóttir

Tónlistarmaðurinn Aron Can var með sérstaka forsýningu á tónlistarmyndbandi sínu við lögin Flýg upp og Varlega. Fjölmennt var í Egilshöll þar sem lögin voru spiluð í fyrsta skipti.

Notendur af Sambandsappinu gátu svo líka horft á myndbandið í gærkvöldi. Myndbandið verður svo frumsýnt formlega á hádegi og verður því hægt að horfa á það hér á Vísi á slaginu 12.

Lögin Flýg upp og Varlega eru af væntanlegri plötu tónlistarmannsins. Þetta eru fyrstu lögin sem hann sendir frá sér síðan árið 2019. Með aðalhlutverk í myndbandinu fara Aron Can sjálfur, tónlistarkonan GDRN og Birnir.

Klippa: Aron Can - Flýg upp // Varlega

„Mikið var lagt í tökur á þessu kvikmyndaverki og farið langt út fyrir ramma tónlistarmyndbands og skapaður nýr heimur, Reykjavík í framtíðinni og augljóst er að eitthvað mikið hefur gengið á,“ segir um myndbandið.

Leikstjóri er Erlendur Sveinsson og tökumaður Andri Haraldsson. Jónas Þórhallsson sá um klippingu, Jakob Þórhallsson sá um VFX galdrana og Hanna Björk Valsdóttir framleiðir.

Í myndaalbúminu hér fyrir neðan má sjá myndir Gunnhildar Helgu Katrínardóttur frá forsýningunni í gær.