Innlent

Krefjast þess að Ísland hætti afskiptum af innanríkismálum Kína

Samúel Karl Ólason skrifar
Jin Zhijian, sendiherra Kína á Íslandi
Jin Zhijian, sendiherra Kína á Íslandi Vísir/Einar

Viðskiptaþvinganir Kína gegn íslenskum lögmanni byggja á ákvörðun yfirvalda hér á landi að taka þátt í refsiaðgerðum gegn Kína vegna mannréttindabrota á Úígúrum þar í landi. Í stóryrtri yfirlýsingu frá sendiráði Kína hér á landi segir að ákvörðun stjórnvalda byggi á engu nema lygum og upplýsingafölsun.

Í yfirlýsingunni, sem birt var á vef sendiráðsins, er því haldið fram að ákvörðun ríkisstjórnar Íslands brjóti bæði gegn alþjóðalögum og stöðlum í milliríkjasamskiptum. Þar að auki skemmi hún verulega samband Íslands og Kína.

Þá segir að utanríkisráðuneyti Kína hafi kallað sendiherra Íslands þar á teppið og mótmælum yfirvalda í Peking komið á framfæri við hann.

„Kína er staðráðið í að vernda fullveldi, öryggi og hagsmuni ríkisins,“ segir í yfirlýsingunni. „Við krefjumst þess að Ísland virði fullveldi, öryggi og hagsmuni ríkisins, og hætti afskiptum af innanríkismálum Kína undir yfirskyni mannréttinda.“

Lögmanninum Jónasi Haraldssyni hefur verið meinað að ferðast til Kina og eigur hans þar, ef einhverjar, frystar. Hann hefur skrifað greinar í Morgunblaðið þar sem hann hefur gagnrýnt yfirvöld í Kína.

Guðlaugur Þór Guðlaugsson, utanríkisráðherra, hefur lýst aðgerðunum sem algerlega óviðunandi.

Í yfirlýsingu ráðuneytisins segir berum orðum að Jónas hafi verið beittur viðskiptaþvingunum vegna ákvörðunar ríkisstjórnar Íslands í síðasta mánuði um að taka þátt í samstilltum aðgerðum gegn Kína vegna mannréttindabrota á Úígúrum.

Yfirvöld í Kína hafa undanfarin ár verið sökuð um alvarleg mannréttindabrot í Xinjiang-héraði, þar sem íbúar tilheyra flestir þjóðarbroti sem kallast Úígúrar. Um er að ræða múslima sem tala tungumál sem byggir á tyrknesku.

Hundruð þúsund þeirra hafa verið færð í búðir sem yfirvöld í Kína hafa kallað „endurmenntunarbúðir“ en þaðan hafa borist fjölmargar fregnir um umfangsmikil mannréttindabrot eins og þrælkunarvinnu, þvingaðar ófrjósemisaðgerðir og alvarleg kynferðisbrot.

Sjá einnig: Börn Úígúra tekin af fjölskyldumeðlimum og flutt í búðir fyrir munaðarleysingja

Þessu hefur ítrekað verið lýst sem mannréttindabrotum og jafnvel þjóðarmorði.

Ráðamenn í Peking hafa ítrekað sagt að um innanríkismál sé að ræða og það komi umheiminum ekki við. Þá hefur því verið haldið fram að um sé að ræða búðir þar sem Úígúrar hljóti þjálfun sem eigi að nýtast þeim vel í nútímasamfélagi.


Tengdar fréttir

Segja Bandaríkjunum að hætta að leika sér að eldi

Ráðamenn í Kína hafa lýst heræfingum sínum nærri Taívan sem æfingum fyrir átök og varað Bandaríkjamenn við því að eiga í samskiptum við eyríkið. Bandarískir erindrekar eru staddir í Taívan í ferð sem Hvíta húsið segir ætlað að sýna stuðning Bandaríkjanna við ríkið.

Úígúrar í Tyrklandi óttast að verða framseldir fyrir bóluefni

Yfirvöld í Tyrklandi hafa handtekið tuga Úígúra sem hafa flúið frá Kína til Tyrklands. Um það bil fimmtíu eru í haldi yfirvalda og í hættu á að verða framseldi. Úígúrar óttast að verða sendir aftur til Kína í skiptum fyrir bóluefni sem Tyrkir hafa keypt af Kínverjum en ekki fengið afhent.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.