Hraunpollurinn tæmdist að hluta og óvíst hvert kvikan flæddi

Elín Margrét Böðvarsdóttir skrifar 3. apríl 2021 14:05

Hraunpollurinn sem myndast hafði norður af gígnum Norðra í Geldingadölum tæmdist að hluta í nótt. Yfirborð pollsins hefur lækkað um nokkra metra en ekki er vitað með vissu hvert kvikan flæddi frá pollinum.

Eldfjallafræði og náttúruvárhópur Háskóla Íslands vekur athygli á þessu í færslu á Facebook þar sem bornar eru saman eldri og nýrri myndir úr vefmyndavél.

„Yfirborð pollsins hefur lækkað um einhverja metra, en ekki er vitað með vissu hvert hraunkvikan flæddi frá pollinum, en lægð í rima hans að norðanverðu gæti bent til þess að útflæðið hafi verið til norðvesturs. Flæði heldur áfram í pollinn og verður fróðlegt að sjá hvort og hversu hratt tekst að fylla hann á nýjan leik,“ segir í færslunni.

Birtar eru einnig myndir sem teknar eru úr streymi úr vefmyndavél mbl.is og sýnt með hvítri brotalínu hvernig hraunpollurinn hefur breyst fyrir og eftir tæmingu. „Jafnframt er athyglisvert að hrúgöldin sem urðu til við hrun frá gígveggjunum hafa færst til og greinilega eru, tímabundið, á floti í hraunflæðinu. Hrúgaldið með gula punktinum hefur færst verulega en það með appelsínugula punktinum hefur lítið færst úr stað, en snúist,“ segir ennfremur í færslunni.

Eldgos og jarðhræringar Eldgos í Fagradalsfjalli Vísindi

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.