Körfubolti

Lakers tapaði enn og aftur, Hard­en lagði gömlu fé­lagana, Booker og Doncic sjóðandi heitir

Runólfur Trausti Þórhallsson skrifar
Luka Dončić lét ekkert stöðva sig í nótt.
Luka Dončić lét ekkert stöðva sig í nótt. EPA-EFE/CJ GUNTHER

Alls fóru tíu leikir fram í NBA-deildinni í körfubolta í nótt. Þar ber helst að nefna að Los Angeles Lakers tapaði 112-97 gegn Milwaukee Bucks, Brooklyn Nets lagði Houston Rockets 120-108 og Dallas Mavericks vann Boston Celtics 113-108.

Þá var Devin Booker sjóðandi heitur í enn einum sigri Phoenix Suns en liðið vann fimm stiga sigur á Chicago Bulls, 121-116.

Það var vitað að ríkjandi meistarar í Los Angeles Lakers ættu erfiðan leik fyrir höndum gegn Giannis Antetokounmpo og félögum í Milwaukee Bucks þar sem LeBron James og Anthony Davis eru enn frá. Lakers byrjaði þó frábærlega og skoruðu 30 stig í fyrsta leikhluta, þar af voru átta úr þriggja stiga skotum.

Sóknarleikur liðsins hrundi hins vegar í öðrum leikhluta, liðið skoraði aðeins 19 stig og var átta stigum undir í hálfleik, staðan þá 57-49. Bucks reyndust sterkari aðilinn í síðari hálfleik og unnu á endanum 15 stiga sigur, 112-97.

Jrue Holiday var stigaæstur í liði Bucks með 28 stig, þar á eftir kom Giannis með 25 stig ásamt því að hann tók 10 fráköst. Hjá Lakers var Montrezl Harrell stigahæstur með 19 stig á meðan Dennis Schröder skoraði 17 stig og gaf átta stoðsendingar. Nýi maðurinn Andre Drummond lék aðeins 14 mínútur, skoraði fjögur stig, gaf tvær stoðsendingar og tók eitt frákast.

Hoston Rockets byrjaði leikinn gegn Brooklyn Nets frábærlega, skoruðu 42 stig í fyrsta leikhluta og voru 11 stigum yfir í hálfleik, staðan þá 68-57. Leikmenn Nets stigu heldur betur upp í síðari hálfleik á meðan sóknarleikur Houston einfaldlega hrundi. Liðið skoraði aðeins 40 stig í öllum síðari hálfleik á meðan Nets skoruðu 63 og unnu leikinn 120-108.

James Harden var heldur rólegur gegn sínum gömlu félögum en hann skoraði 17 stig, gaf sex stoðsendingar og tók átta fráköst á þeim 27 mínútum sem hann spilaði. Kyrie Irving spilaði 39 mínútur og nýtti þær til hins ítrasta, hann skoraði 31 stig, gaf 12 stoðsendingar og tók sex fráköst. Þá skoraði Joe Harris 28 stig.

Hjá Rockets var Kevin Porter Jr. með 20 stig.

Leikur Boston Celtics og Dallas Mavericks var vægast sagt tvískiptur. Dallas voru 19 stigum yfir í hálfleik, 64-45. Boston gáfu allt sem þeir áttu í síðari hálfleikinn og þá aðallega fjórða leikhlut asem þeir unnu með 12 stiga mun en allt kom fyrir ekki, lokatölur 113-108 Dallas í vil.

Luka Dončić var að venju frábær í liði Dallas en hann skoraði 36 stig ásamt því að taka átta fráköst og gefa fimm stoðsendingar. Jalen Brunson kom þar á eftir með 21 stig. Hjá Celtics skoruðu þrír leikmenn yfir 20 stig. Jayson Tatum var stigahæstur með 25 stig, Jaylen Brown skoraði 24 og Kemba Walker skoraði 22 stig.

Devin Booker skoraði 45 stig í fimm stiga sigri Suns á Chicago Bulls. Ótrúlegur leikur og Suns eru komnir upp í 2. sæti Vesturdeildar eftir fjóra sigra í röð. Chris Paul skoraði 19 stig og gaf 14 stoðsendingar í liði Suns í nótt.

Önnur úrslit

Detroit Pistons 101 – 124 Portland Trail Blazers

Indiana Pacers 87 – 92 Miami Heat

Memphis Grizzlies 107 – 111 Utah Jazz

Oklahoma City Thunder 113 – 103 Toronto Raptors

Minnesota Timberwolves 102 - 101 New York Knicks

San Antonio Spurs 120 – 106 Sacramento Kings

Staðan

Í Austurdeildinni er Brooklyn Nets á toppnum með 33 sigra og 15 töp. Þar á eftir koma Philadelphia 76ers [32-15] og Milwaukee Bucks [30-17]. Charlotte Hornets er svo óvænt í 4. sæti [24-22].

Í Vesturdeildinni er Utah Jazz sem fyrr á toppnum [36-11], Phoenix Suns er komið upp í annað sætið [33-14] á meðan Los Angeles Clippers [32-17] og Lakers [30-18] koma þar á eftir. Denver Nuggets og Portland eru svo aðeins sigri frá því að jafna Lakers í sigurfjölda og meistararnir gætu hrapað mjög hratt niður ef þeir fara ekki að vinna leiki.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.