„Allir vilja sparka í okkur meðan við liggjum“

Kenny hefur fengið mikla gagnrýni að undanförnu enda hafa Írar ekki unnið leik síðan hann tók við liðinu. Írland hefur tapað sjö af ellefu leikjum undir stjórn Kennys og gert fjögur jafntefli. Um helgina tapaði Írland óvænt fyrir Lúxemborg, 0-1, á heimavelli í undankeppni HM 2022.

Þrátt fyrir slæma byrjun í starfi landsliðsþjálfara er Kenny brattur og tók til varna á blaðamannafundi eftir leikinn gegn Katar í gær.

„Ég er vanur að vinna í hverri viku. Ég vann írsku deildina fjögur ár í röð eða eitthvað. Ég er vanur að vinna og tapaði varla leik í fimm ár og í U-21 árs liðinu töpuðum við varla,“ sagði Kenny sem stýrði Dundalk áður en hann byrjaði að starfa hjá írska knattspyrnusambandinu.

„Ég fékk þetta starf vegna árangursins sem ég hef náð og er ánægður með framfarirnar sem leikmennirnir hafa sýnt.“

Kenny segist vera að reyna að innleiða nýjan leikstíl hjá írska liðinu og það taki tíma.

„Við erum svekktir með úrslitin gegn Lúxemborg en núna koma allir og vilja sparka í okkur meðan við liggjum,“ sagði Kenny.

„Og það er allt í lagi. Það er hluti af þessu en við höfum tröllatrú á leikmönnunum í hópnum og höldum að við munum búa til mjög, mjög gott lið á næstu árum. Og ég ætla að vera hluti af því og sjá til þess að við verðum enn betri.“

Næsta verkefni írska liðsins eru tveir vináttulandsleikir gegn Andorra og Ungverjalandi í júní.