Erlent

Forsetaframbjóðandi lést úr Covid rétt eftir kosningar

Kjartan Kjartansson skrifar
Kosningaauglýsing með mynd af Guy-Brice Parfait Kolelas.
Kosningaauglýsing með mynd af Guy-Brice Parfait Kolelas. AP/Lebon Chansard Ziavoula

Guy-Brice Parfait Kolelas, einn af leiðtogum stjórnarandstöðunnar og forsetaframbjóðandi í Vestur-Kongó, lést af völdum Covid-19 aðeins nokkrum klukkustundum eftir að kjörstöðum var lokað í gær. Kolelas var einn af sex mótframbjóðendum Denis Sassou Nguesso, sitjandi forseta.

Staðfest var að Kolelas væri smitaður af kórónuveirunni þegar hann var lagður inn á sjúkrahús í höfuðborginni Brazzaville um helgina. Áður hafði hann sagt stuðningsmönnum sínum að hann væri mögulega smitaður af malaríu.

Í myndbandi sem Kolelas deildi með stuðningsmönnum sínum á laugardag  tók hann af sér súrefnisgrímu og sagðist hann berjast fyrir lífi sínu. Hvatti hann þá jafnframt til að kjósa. Kolelas lést í sjúkraflugvél sem var á leið til Frakklands. Hann var 61 árs.

Búist var við því að Kolelas yrði í öðru sæti í kosningunum. Andlát hans ógildir ekki kosningarnar samkvæmt kosningalögum í Vestur-Kongó.

Fastlega er gert ráð fyrir að Sassou Nguesso forseti sitji áfram við völdin eftir kosningarnar, að sögn breska ríkisútvarpsins BBC. Hann hefur verið í embætti frá 1979 nær sleitulaust fyrir utan fimm ára tímabil eftir kosningaósigur árið 1992.

Slökkt var á internetinu í landinu fyrir kosningarnar. Þverafríska sósíaldemókratabandalagið, stærsti stjórnarandstöðuflokkurinn, sniðgekk kosningarnar af ótta við að þær valdi klofningi í landinu. Biskupaþing kaþólsku kirkjunnar í Vestur-Kongó lýsti jafnframt áhyggjum af gegnsæi í framkvæmd kosninganna.

Í kosningunum 2016 hlaut Sassou Nguesso 60% atkvæða gegn 15% Kolelas. Að þeim loknum voru tveir forsetaframbjóðendur handteknir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.