Innlent

Mummi reynir að koma vitinu fyrir páfa

Jakob Bjarnar skrifar
Guðmundur Ingi umhverfis- og auðlindaráðherra, hefur ritast páfa bréf og biðlar til manngæsku hans og umburðarlyndis.
Guðmundur Ingi umhverfis- og auðlindaráðherra, hefur ritast páfa bréf og biðlar til manngæsku hans og umburðarlyndis.

Guðmundur Ingi Guðbrandsson umhverfis- og auðlindaráðherra hefur ritað hans heilagleika, Frans páfa í Vatíkaninu, opið bréf þar sem hann fer vinsamlegast fram á að hann dragi til baka ákvörðun um að samband samkynhneigðra para njóti ekki blessunar kaþólsku kirkjunnar.

Guðmundur Ingi, sem jafnan er kallaður Mummi, hefur áður ritað páfa bréf svipaðs efnis. Það var árið 2018. Hann segist, í samtali við Vísi, ekki hafa fengið svar við því bréfi. En hann hafi reyndar ekki gert ráð fyrir því. „Neinei, en mér finnst mikilvægt að röddin heyrist. Ég þekki það ágætlega sem ráðherra að maður fær bréf og ekkert alltaf sem maður er beðinn um svör. En meðtekur skilaboðin. Nei, ég hef ekki fengið svar við því bréfi. En vona að boðskapurinn komist til skila.“

Og sérstaklega vonar Mummi að skilaboð bréfs þess sem hann ritar núna, þar sem hann skorar á páfann á að draga til baka ákvörðun um að banna blessun sambanda hjá samkynja pörum komist til skila. „Það myndi gera mig mjög glaðan ef hann myndi draga ákvörðunina til baka og ekki svara mér. Þá væri maður búinn að ná árangi.“

Sjá einnig: Vatíkanið bannar blessun samvistar sam­kynja para

Guðmundur Ingi segir þetta horfa þannig við sér að kominn sé tími til að kaþólska kirkjan og reyndar trúarbrögð almennt, viðurkenni að kynhneigð er ekki lífsstíll, þetta er ekki val.

„Að viðurkenna okkur sem erum hinsegin sem þau sem við erum. Veita því viðurkenningu. Það skiptir marga máli, sérstaklega þá sem eru trúaðir, að fá þessa viðurkenningu. Ég er sannfærður um að við fáum miklu betra samfélag þegar mannréttindi eru virt.“

Bjó í klaustri um mánaða skeið sem ungur maður

Umhverfisráðherra segist einnig óttast, og vísar þá til áhrifa páfa, að þegar svona er í umræðunni geti það leitt til þess að fordómar og þekkingarleysi grasseri sem bitnar þá á fólki sem er hinsegin.

Umslag bréfsins sem nú er í tösku einhvers póstburðarmannsins. Guðmundur Ingi væntir ekki svars en vonast til þess að skilaboðin heyrist.

Mannréttindabarátta samkynhneigðra, ekki síst á Íslandi, hefur verið afskaplega farsæl. En staða samkynhneigðra víða um heim er slæm. En stundum hvarflar að manni að kirkjan sé sjálfri sér verst með þvergirðingi í þessum efnum sem byggist á morknum staf í hinni helgu bók. Og spyrja má af hverju samkynhneigðir telji ekki hreinlega vert að sniðganga kirkjuna. Ert þú trúaður sjálfur?

„Nei, ég er ekkert sérstaklega trúaður. En ég bjó í kaþólsku klaustri í nokkra mánuði þegar ég var ungur maður og ber mjög mikla virðingu fyrir trúnni. 

Ber virðingu fyrir því að fólk trúi. Og ég veit að hún skiptir mörg mjög miklu máli. Þess vegna skiptir það svo miklu máli að trúarbrögðin séu opin fyrir því fólki sem trúir, alveg sama hver staða þess er. núverandi páfi hefur aldrei slegið mig öðru vísi en vera hjartahlýr maður og þess vegna skora ég á hann að standa með okkur hinsegin fólki.“

Stendur sjálfur utan trúfélaga

Mummi stendur sjálfur utan trúfélaga en var íhugaði á yngri árum að gerast munkur þegar hann dvaldi í klaustri í Þýskalandi; þá voru að brjótast um í honum allskyns tilvistarlegar spurningar. Hann telur ekki vert að bregðast við afstöðu kirkjunnar með því að sniðganga hana.

„Fyrir mér hlýtur kirkjan sem boðar ást og frið og kærleika að vilja vera opin fyrir öllum þegnum. Sumt fólk trúir. Trúin veitir því skjól, hugarró, von og gefur því tilgang. Þess vegna er erfitt fyrir slíkt fólk þegar kaþólska kirkjan í þessu hlutverki útilokar það. Páfinn hefur afskaplega mikil áhrif á marga sem eru í kaþólsku kirkjunni. 

Skilaboð sem páfinn sendir frá sér skipta verulega miklu máli að mati Guðmundar Inga sem freistar þess nú að koma páfanum í skilning um að samkynhneigð sé ekki tískufyrirbæri.Vísir/Vilhelm/Getty Images/Franco Origlia

Það eru skilaboðni sem skipta svo miklu máli og þegar þau eru þessi, að tala gegn sjálfsögðum mannréttindum hinsegin fólks, finnst mér það mjög alvarlegt mál,“ segir Guðmundur Ingi. En tek það einnig fram að þessi umræddi páfi sem nú fær frá honum bréf hafi talað fyrir því að sýna eigi hinsegin fólki virðingu og skilning. „En ég vil sjá að við fáum viðurkenningu á því sem við erum.“

Ekki synd að sofa hjá samkynja einstaklingi

Bréfið sem Guðmundur Ingi sendi páfa fer hér á eftir. Undir yfirskriftinni: „Það er ekki synd að sofa hjá samkynja einstaklingi. Hann fylgir bréfi sínu úr hlaði með að greina frá því að með því sé skorað á páfa að draga til baka umdeilda ákvörðun um að banna blessun sambanda hjá samkynja pörum.

Kynhneigð er ekki tískufyrirbæri sem við skiptum út með nýrri vorlínu.

„Ég hvet hann til þess að taka af skarið gagnvart íhaldsömum öflum í kaþólsku kirkjunni og verja sjálfsögð mannréttindi hinsegin fólks. Þetta er í annað skipti sem ég sendi Francis páfa bréf. Núverandi páfi hefur alltaf slegið mig sem góður og hjartahlýr maður og hann þarf hvatningu okkar og stuðning til góðra verka. Gleymum því aldrei að rödd okkar allra skiptir máli. Gefumst aldrei upp fyrir fordómum og þekkingarleysi.“

Bréfið er hér að neðan.

Yðar heilagleiki, Frans páfi.

Ég skrifa þér frá Íslandi. Ástæða þess að ég skrifa þér er að ég hef alltaf haft trú á þér. Ég held að þú viljir og getir breytt viðhorfum til hinsegin fólks innan sem utan kaþólsku kirkjunnar. Síðustu fréttir eru þó ekki uppörvandi.

Það gerir mig dapran og vonsvikinn að lesa það að kaþólska kirkjan geti ekki lagt blessun sína yfir samkynja sambönd því guð blessi ekki synd. Hvernig getur það verið synd að elska þau sem maður elskar og vilja innsigla það með formlegum hætti? Þetta viðhorf stríðir gegn allri heilbrigðri skynsemi. Skilaboðin sem kaþólska kirkjan sendir með þessu til heimsins eru í senn dapurleg og mannfjandsamleg.

Og, það er í raun enn verra í þessu samhengi að segja að guð geti hins vegar blessað synduga menn og veitt þeim tækifæri til að breytast. Hinsegin fólk er ekki að leitast eftir því að breyta kynhneigð eða kynvitund sinni. Það er nú mergurinn málsins. Við óskum eftir því að vera viðurkennd af samfélaginu sem við sjálf. Í síðasta bréfi mínu til þín minnti ég þig á að kynhneigð fólks er ekki lífsstíll og ekki val. Ekki heldur kynhneigð hinsegin fólks. Kynhneigð er ekki tískufyrirbrigði sem við skiptum út með nýrri vorlínu. Hún bara er.

Maður í þinni stöðu er áhrifavaldur í lífi margra út um allan heim. Orðum þínum og ákvörðunum fylgir því mikil ábyrgð. Ég skora á þig að draga ákvörðun kaþólsku kirkjunnar til baka og standa með hinsegin fólki. Þú getur enn haft afgerandi jákvæð áhrif á viðhorf í garð okkar sem hinsegin eru, innan sem utan kirkjunnar. Finndu kjarkinn í gegnum bænir þínar og stattu með okkur. Með því stendur þú með sjálfsögðum mannréttindum og gætir komið í veg fyrir andúð og hatur á saklausu fólki sem vill bara vera eins og það er.

Ég óska þér alls hins besta,

Guðmundur Ingi Guðbrandsson.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.