Innlent

Færu beint í hörðustu að­gerðir ef til fjórðu bylgju kæmi

Hallgerður Kolbrún E. Jónsdóttir skrifar
Víðir Reynisson segir að ráðist verði í hörðustu aðgerðir ef til fjórðu bylgju kemur.
Víðir Reynisson segir að ráðist verði í hörðustu aðgerðir ef til fjórðu bylgju kemur. Ljósmynd/Almannavarnir

Víðir Reynisson yfirlögregluþjónn segir að gripið yrði strax til harðra aðgerða ef vísbendingar kæmu upp um að fjórða bylgja kórónuveirufaraldursins væri að hefjast hér á landi. Almannavarnadeild ríkislögreglustjóra ákvað í dag að færa almannavarnastig úr neyðarstigi niður á hættustig, í fyrsta skipti síðan 4. október síðastliðinn.

„Eitt af því sem við erum búin að læra er að vera undirbúin undir það að ef að við förum að fá vísbendingar um það að hér sé að byrja fjórða bylgja að grípa strax til hörðustu aðgerða. Ekki að taka margar vikur í að segja „heyrðu við prófum þetta núna“ svo tökum við eftir tvær vikur ákvörðun um að herða aðgerðir aðeins meira,“ sagði Víðir í viðtali í Reykjavík síðdegis á Bylgjunni í dag.

Hann segir það hafa sýnt sig að þegar harðar aðgerðir voru settar á hafi það borið bestan árangur.

„Ég held að við eigum ekki að taka það í einhverjum skrefum þegar að vísbendingar eru um næstu bylgju heldur að grípa strax til harðra aðgerða og keyra þetta niður í það að vera viðráðanlegt og geta þá slakað á,“ segir Víðir.

Staðan hér á landi er talin nokkuð góð, fáir greinast smitaðir af veirunni dag hvern, enginn liggur inni á Landspítala vegna veirunnar og bólusetningar eru farnar af stað af mikill alvöru. Greint var frá því í dag að Íslandi berist fleiri bóluefnaskammtar gegn veirunni en gert var ráð fyrir en þegar hefur bóluefni fyrir alla landsmenn verið tryggt.

„Staðan er auðvitað góð, ég held að við hljótum að vera sammála um það að það eru orðnir ansi margir mánuðir, ég held að staðan hafi ekki verið svona góð síðan áður en að önnur bylgjan var að byrja í ágúst á síðasta ári,“ segir Víðir.

„Þetta er gríðarlega verðmæt staða fyrir okkur og við sem samfélag verðum að læra af reynslunni frá því síðasta sumar og síðasta haust, hvernig við ætlum að fara með þetta.“

Hann segir mikilvægt hve almenn þátttaka hafi verið í sóttvarnaaðgerðum. Það sé það sem skipti megin máli og skilji okkur að frá löndunum í kring um okkur, þar sem faraldurinn geisar enn af miklum ofsa.

„Það eru flest lönd að fást við það að vera í vandræðum með að fá alla, eins og þarf, til að vera með í aðgerðum. Til að virða sóttvarnareglurnar, til að skilja aðgerðirnar og taka þátt í þessu eins og mér finnst íslenska samfélagið hafa gert,“ segir Víðir.


Tengdar fréttir

Neyðarstigi aflétt í fyrsta sinn í fjóra mánuði

Ríkislögreglustjóri, í samráði við sóttvarnalækni, hefur ákveðið að færa almannavarnastig úr neyðarstigi niður á hættustig vegna kórónuveirufaraldursins. Neyðarstigi var lýst yfir 4. október 2020 þegar þriðja bylgja faraldursins hófst og smitum tók að fjölga verulega. Þetta kemur fram í tilkynningu frá almannavörnum.

Enginn með virkt smit á Landspítalanum og gleðin allsráðandi

Þeim árangri hefur verið náð í baráttunni gegn kórónuveirunni innanlands að nú liggur enginn inni á Landspítalanum með virkt COVID-19 smit. Már Kristjánsson, yfirlæknir smitsjúkdómadeildar spítalans, segir að í hugum heilbrigðisstarfsfólksins sé þetta afar sérstakur dagur og skyldi engan undra því starfsfólk spítalans hefur borið hitann og þungann af þeirri erfiðisvinnu sem felst í því að hlúa að þeim sem verst hafa orðið fyrir barðinu á veirunni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×