Innlent

Þörf á mun meiri inniviðafjárfestingum opinberra aðila en áætlað er

Heimir Már Pétursson skrifar
Mikil þörf er á innviðafjárfestingum sérstaklega í vegakerfinu sem ber varla þá umferð sem fer um það nú þegar.
Mikil þörf er á innviðafjárfestingum sérstaklega í vegakerfinu sem ber varla þá umferð sem fer um það nú þegar. Vísir/Vilhelm

Formaður Samtaka iðnaðarins segir þörf á mun meiri fjárfestingum í innviðum landsins en áætlanir opinberra aðila upp á 139 milljaðar kveða á um á þessu ári. Í kreppunni nú vegna kórónuveirufaraldurins sé rétti tíminn til að gefa verulega í.

Á útboðsþingi Samtaka Iðnaðarins í morgun kynntu opinberir aðilar útboðs- og framkvæmdaáætlanir sínar fyrir yfirstandandi ár.

samtök iðnaðarins

Upphæðirnar sjást í milljörðum á dökkbláu súlunum fyrir þetta ár á meðfylgjandi mynd en áætlanir ársins í fyrra sjást á ljósbláu súlunum. Það er áberandi hvað stærstu fjárfestingaraðilarnir, Reykjavíkurborg, Vegagerðin, Framkvæmdasýsla ríkisins og Ísavía ætla að gefa mikið í á þessu ári.

Árni Sigurjónsson formaður Samtaka iðnaðarins segir skýringanna að hluta til að leita í því að ekkert varð af um þriðjungi framkvæmdanna í fyrra.

Árni Sigurjónsson formaður Samtaka iðnaðarins segir viss vonbrigði að opinberir aðilar setji ekki meira í innviðafjárfestingar því á krepputímum sé einmitt tíminn til þess.Stöð 2/Arnar

„Það eru vissulega örlítil vonbrigði að sjá þessa lækkun þótt að heimsfaraldur kórónuveiru skýri auðvitað stóran hluta af þessu. Við nefndum sem dæmi að Ísavia hafði áætlanir uppi um tuttugu milljarða fjárfestingar. Endaði í einhverjum tvö hundruð milljónum rétt rúmlega. Þannig að það munar mjög miklu um það,“ segir Árni. Heildar samdrátturinn hafi verið upp á 29 prósent.

Vegagerðin fjárfesti fyrir 7,6 milljörðum minna í fyrra en áætlanir gerðu ráð fyrir, meðal annars vegna seinkunar ýmissra útboða. Áætlanir Ísavia hrundu á sama tíma og tekjurnar með mikilli fækkun ferðamanna. Reykjavíkurborg sker sig aftur á móti úr sem ákvað að auka sínar framkvæmdir verulega í fyrra vegna faraldursins.

Hér má sjá áætlanir opinberra aðila í fyrra á dökkbláu súlunum annars vegar og það sem raunverulega var fjárfest frir á ljósbláu súlunum hins vegar.samtök iðnaðarins

Árni segir hækkun áætlana milli ára lítilsháttar eða úr 4,5 prósentum af landsframleiðslu í 4,6 prósent. Vegagerðin áætli 11,1 milljarði minna í framkvæmdir á þessu ári en því síðasta sem séu viss vonbrigði því verkefnin séu ótalmörg og mjög brýn. Það sé þó jákvætt að stjórnvöld hafi sett fókusinn á innviðafjárfestingar og margt sé í pípunum á næstu árum eins og Sundabraut.

Árni segir uppsafnaða þörf fyrir fjárfestingar í innviðum langt umfram þær áætlanir sem kynntar voru í dag. Í kreppunni nú sé rétti tíminn til stórræða.

„Fjárfesting í innviðum í dag skilar hagvexti og styrkir okkur til lengri tíma litið. Þannig að því lengur sem við seinkum þessum hlutum þeim mun dýrara mun það verða fyrir okkur í framtíðinni að bæta í þessa liði. Þessu er ekki kastað á glæ. Menn fara ekki í framkvæmdir framkvæmdanna vegna heldur til að styðja við innviðina, atvinnulíf og líf fólks í landinu,“ segir Árni Sigurjónsson.


Tengdar fréttir

Vegagerð hafin milli Mjólkár og Dynjanda

Vinna er hafin við lagningu nýs vegarkafla Vestfjarðavegar í botni Arnarfjarðar, milli Mjólkárvirkjunar og fossins Dynjanda. Kaflinn er 4,3 kílómetra langur fyrir Meðalnes, milli Dynjandisvogar og Borgarfjarðar. Suðurverk annast stóran hluta verksins sem undirverktaki Íslenskra aðalverktaka.

Opinberir aðilar áforma framkvæmdir upp á 139 milljarða í ár

Framkvæmdir opinberra aðila voru mun minni í fyrra en þeir höfðu boðað á útboðsþingi í upphafi þess árs. Mestu munar um stórfelldan samdrátt í framkvæmdum hjá Ísavia. Reykjavíkurborg stóð hins vegar nokkurn vegin við áform sem gefin voru á útboðsþingi í byrjun síðasta árs.

Flugstöð og varaflugvellir

Ríkisstjórnin hefur lagt mikla áherslu á að efla og fjárfesta í innviðum samfélagsins. Nú á að gera enn betur og hefja sérstakt 15 milljarða króna flýtifjárfestingarátak sem kynnt var í Hörpu sl. laugardag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.