Röskun verður á skólastarfi HÍ í dag vegna vatnslekans samkvæmt upplýsingum frá skólanum en neyðarstjórn skólans hittist á fundi núna klukkan átta. Sjá tilkynningu skólans hér fyrir neðan:
Öll starfsemi Háskóla Íslands á Háskólatorgi, í Gimli, Lögbergi, Árnagarði og í Aðalbyggingu mun liggja niðri að minnsta kosti til hádegis í dag vegna gríðarlegs vatnstjóns sem orðið hefur í byggingum Háskólans. (Þetta á við um alla starfsemi, þ.m.t. kennslu, rannsóknir og þjónustu).
Nánari upplýsingar verða veittar um leið og fram vindur en verið er að dæla vatni úr húsnæði skólans.
Fram hefur komið í fréttum að rof hafi komið á stóra kaldavatnsæð í Vesturbæ Reykjavíkur í nótt.
Ljóst er að mikið verk er framundan við að koma aðstöðunni í samt horf.
Það var skömmu eftir klukkan eitt í nótt sem slökkvilið höfuðborgarsvæðisins var kallað út vegna lekans. Fóru mannskapur og dælubílar frá þremur stöðvum á staðinn.
Eru slökkviliðsmenn enn við vinnu á vettvangi að sögn varðstjóra en búið er að senda ferska menn á staðinn þar sem dagvaktin hefur nú tekið við af næturvaktinni.
Í tilkynningu frá Veitum segir að talið sé að lekinn sé tengdur framkvæmdum við endurnýjun vatnslagna á Suðurgötu. Lekinn kom upp í lokahúsi vatnsveitu sunnan við aðalbyggingu HÍ. Hann uppgötvaðist í stjórnstöð vatns hjá Veitum þegar vart varð mikils þrýstingsfalls í dreifikerfi kalda vatnsins vestan Snorrabrautar.
„Lekinn var um 500l/s og stóð í 75 mínútur áður en náðist að loka fyrir, það runnu því út um 2250 tonn af vatni,“ segir í tilkynningu Veitna.
Mikið vatn flæddi inn í aðalbyggingu Háskólans, Gimli, Lögberg, Stúdentakjallarann, Árnagarð og fleiri byggingar sem eru austan megin Suðurgötu. Unnið hefur verið að því að dæla vatni út í alla nótt og segir varðstjóri slökkviliðsins mjög mikið vatn hafa flætt inn í byggingarnar.
Samkvæmt dagbók lögreglu mættu starfsmenn HÍ á svæðið til að opna byggingar og fulltrúar Veitna komu og lokuðu fyrir vatnsæðina. Búið var að loka fyrir æðina klukkan rúmlega tvö í nótt samkvæmt upplýsingum frá slökkviliðinu.
Varðstjóri slökkviliðsins segir áætlanir gera ráð fyrir að slökkviliðsmenn verði að störfum á vettvangi að minnsta kosti til hádegis. Aðspurður segir hann þetta með stærri einstaka vatnstjónum á síðari árum.
Þá er kaldavatnslaust í Sæmundargötu 2 til 10 og er eftirfarandi tilkynningu að finna á vef Veitna:
Vegna bilunar er kaldavatnslaust í Sæmundargötu 2-10
Við vörum þig við slysahættu vegna þess að einungis kemur heitt vatn úr blöndunartækjum. Ef þú þarft að sturta niður úr salerninu geturðu notað til þess heita vatnið. Gættu þess þó að það sé ekki alveg sjóðheitt því það getur sprengt postulín.
Þurfirðu neysluvatn meðan á kaldavatnsleysinu stendur, geturðu notað vatn úr heita krananum og kælt það. Brennisteinninn í vatninu getur valdið sumum óþægindum en er skaðlaus.
Starfsfólk Veitna biðst velvirðingar á óþægindum vegna þessa.
Hér fyrir neðan má sjá myndir sem Arnar Halldórsson, tökumaður fréttastofu, tók á vettvangi í morgun.
Fréttin var uppfærð kl. 08:50.
