Segir bókunum hafa fjölgað um 250 prósent

Maí er sá mánuður sem er hvað vinsælastur til ferðalaga að sögn Lundgren. „Við vitum að fólk vill fara í frí eins fljótt og hægt er,“ segir hann í samtali við breska ríkisútvarpið.

Kórónuveirufaraldurinn hefur leikið flugfélög heimsins grátt, enda ferðatakmarkanir í gildi víða um heim og ekki mikill vilji til ferðalaga þegar fólk þarf víða í sóttkví fyrstu dagana. 

Á mánudag tóku nýjar reglur gildi í Bretlandi og þurfa ferðalangar nú að framvísa neikvæðri niðurstöðu úr sýnatöku 72 klukkustundum fyrir brottför og vera í einangrun í allt að tíu daga.

Lundgren segir sýnilega hreyfingu á bókunum í hvert skipti sem slakað er á takmörkunum. Nú þegar bólusetningar eru farnar af stað hefur fólk farið að bóka í síauknum mæli.

„Við vitum að það er uppsöfnuð eftirspurn – við sjáum það í hvert skipti sem slakað er á takmörkunum,“ segir Lundgren.