Og hún fór einnig í framhaldi af því í masternám í næringarfræði í Háskóla Íslands og segir hún það hafa bjargað lífi hennar. Viðtalið varð til þess að nú er komin út bók eftir Elísabetu.
Vala Matt hitti Elísabetu í Íslandi í dag og forvitnaðist um tilurð bókarinnar og fékk einnig að heyra af spennandi heilsunámskeiðum sem hún heldur með Alberti Eiríkssyni sem sjálfur losnaði við ýmsa líkamlega kvilla eftir að hafa fengið ráðgjöf hjá Elísabetu.
„Það kom upp hugmynd að það ætti að verða til bók úr þessari sögu sem ætti að verða þerapíusaga mín. Hvernig ég jafnaði mig af mínum veikindum og hvað ég gerði. Ég lagði af stað með þá bók og skrifa um hvernig ég náði heilsu. Svo hitti ég Valgeir Skagfjörð í kaffiboði og hann poppar bara inn í líf mig og fæ hann til ritstýra bók sem lýsir ferlinu þegar ég næ bata. Til að kynnast fórum við í sumarbústað saman og töluðum og töluðum saman og ég sagði honum sögu mínu í einn eða tvo sólarhringa og ég grét rosalega mikið í þessu ferli.“
Hún segir að þetta ferðalag hafi reynst henni of erfitt og hún hafi ákveðið að bakka með þetta og þau hættu samstarfi.
„Tveimur eða þremur vikum seinna hringi ég í hann og spyr hvort við getum fundið flöt á því að halda áfram. Hann sagði þá að það hafi aldrei neitt annað staðið til og hann vissi bara að hann þyrfti að bíða eftir mér. Við kláruðum söguna í október og hún kom út í nóvember.“
Í bókinni er Elísabet mjög opin og hreinskilin og hlífir sjálfri sér hvergi í lýsingum á ýmsum átökum og einnig leit hennar að ástinni. Í dag er hún á góðum stað í lífinu og hefur slegið í gegn bæði með vinnu sinni sem næringarfræðingur á Heilsuvernd í Kópavogi og einnig nú með námskeiðum ásamt Alberti Eiríkssyni.
„Ég hafði heyrt af námskeiðunum með Elísabetu, hún hafði verið að þróa þetta og bað okkur Bergþór að koma í prufuhóp í fjórar vikur í haust. Hún sendir okkur uppskriftir og leiðbeiningar hvenær við borðum og ákveðið kerfi sem hún var búin að þróa og hanna. Ég vissi ekki alveg við hverjum mátti búast en svo deildi ég með henni öllu sem gerðist,“ segir Albert.
„Það sem gerðist og kom mér mest á óvart var að bólgur hurfu. Kosturinn er að þú ert að borða mat, góðan mat,“ segir Albert.
„Ég var með eina konu fyrir ári síðan sem ég tók á þetta prógramm og hennar akkilesarhæll var að hún var að drekka of mikið áfengi. Ég aðstoðaði hana við það að taka það út og einbeita okkur að hollu og góðu matarræði. Þetta var kona á sjötugsaldri og þakkar mér fyrir þetta í dag. Hún þakkaði mér óvart með að setja á vegginn minn, þakka þér fyrir elsku Elísabet mín og meira segja kynlífið er orðið betra,“ segir Elísabet.
Elísabet aðstoðaði til að mynda Olgu Helgadóttur sem var í mikilli yfirþyngd en á sama tíma að upplifa næringarskort.
„Þetta breytti öllu í mínu lífi og ég held að geti fullyrt það að ég væri ekkert að tala við þig í dag ef hún hefði ekki gripið inn í mín mál á sínum tíma. Þegar ég leita til Betu er ég í ofboðslega miklum næringarskorti. Ég var öll marin og var farin að missa hárið og mér leið ofboðslega illa andlega. Það helst í hendur ef þú ert ekki að nærast fer andlega heilsan niður. Hún gjörsamlega breytti mínu lífi. Það sem er svo fallegt er að hún byrjar á því að skoða alla söguna þína og horfir á hana og hjálpar þér út frá því hver þú ert en ekki út frá einhverri formúlu,“ segir Olga.
