Ákveðinn útsynningur ræður ríkjum í veðrinu

Sunna Kristín Hilmarsdóttir skrifar 4. janúar 2021 06:59

Það verður frekar hlýtt á landinu í dag en búast má við skúrum eða éljum á vestanverðu landinu. Vísir/Vilhelm

Ákveðinn útsynningur mun ráða ríkjum í veðrinu í dag og mun ganga á með dálitlum skúrum eða éljum á vestandverðu landinu. Eystra helst þó að mestu leyti bjart að því er segir í hugleiðingum á vef Veðurstofu Íslands.

Hiti í dag verður á bilinu núll til átta stig, hlýjast á Austfjörðum. Í nótt nálgast svo úrkomusvæðið landið að sunnan og rignir því um tíma syðst á landinu.

„Heldur hægari vestlægir vindar á morgun, él á víð og dreif, en úrkomulaust að kalla fyrir austan og kólnandi veður.

Á miðvikudag er búist við norðvestanátt með stöku éljum á Norður- og Austurlandi, en léttir til fyrir sunnan og vestan og kólnar talsvert, en á fimmtudagkvöld gæti farið að snjóa á vesturhelmingi landsins,“ segir í hugleiðingum veðurfræðings.

Veðurhorfur á landinu:

Suðvestan 10-18 m/s og skúrir eða él, hvassast NV-lands, en bjart með köflum eystra. Fer að rigna syðst í nótt. Hiti 0 til 8 stig, hlýjast austast.

Vestlæg átt, 3-10 og dálítil él á morgun, en þurrt að mestu eystra. Hiti nærri frostmarki.

Á þriðjudag:

Suðvestlæg átt, 3-8 m/s og él, en 8-13 og slydda eða rigning SA-lands og snjókoma til fjalla. Hiti 1 til 6 stig, en kólnar seinni partinn.

Á miðvikudag:

Norðvestan 8-13 m/s og él eða dálítil snjókoma á N- og A-landi, en annars léttskýjað. Frost 5 til 10 stig.

Á fimmtudag:

Hæg suðlæg eða breytileg átt, víða bjartviðri og talsvert frost, en vaxandi suðvestanátt með snjókomu V-til um kvöldið og hlýnar.

Á föstudag:

Allhvöss eða hvöss suðvestanátt með rigningu eða slyddu, en snjókomu um kvöldið. Úrkomulítið NA-lands. Hlýnar í bili.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.