Selja snyrtivörur sem innihalda efni sem ESB hefur bannað

Stjórn félags lyfsala í Danmörku hvetur öll apótek í landinu til að fjarlægja þegar í stað úr hillunum snyrtivörur sem innihalda bönnuð rotvarnarefni, HPMB, sem mögulega geta valdið krabbameini. Verslanakeðjurnar Matas og Coop í Danmörku ætla einnig að fjarlægja viðkomandi vörur úr verslunum sínum.

Í yfirlýsingu stjórnarinnar, sem danskir fjölmiðlar greina frá, segir að framleiðendur hafi ekki veitt upplýsingar um að vörurnar innihéldu bönnuð efni. Þess vegna hafi apótekin ekki vitað að í hillum þeirra væru vörur sem innihéldu þau. Í frétt danska blaðsins Politiken segir að framleiðendur L'Oreal haldi áfram að senda vörur með bönnuðum efnum í verslanir. Fyrirtækið líti svo á að vörurnar séu öruggar.

Viðbrögð lyfsala voru vegna ábendingar neytendasamtaka til dönsku umhverfisstofnunarinnar um sölu á fjölda vörutegunda með bönnuðu rotvarnarefni, þar á meðal vissra vara frá Garnier, Vichy, La Roche-Posey, L'Occitane og L'Oreal. 

Bann við framleiðslu snyrtivara með fimm gerðum parabena tók gildi 30. október 2014 hér á landi og í aðildarríkjum Evrópusambandsins. Frá og með 30. júlí 2015 mátti ekki selja snyrtivörur sem framleiddar voru áður en bannið tók gildi, að því er Gunnlaug H. Einarsdóttir, sviðsstjóri hjá Umhverfisstofnun, greinir frá.

Hún segir að í fyrra hafi verið lögð áhersla á eftirlit með sölu á andlitslitum fyrir börn. „Þá fjarlægðum við af markaði vörur sem innihéldu bönnuð paraben. Síðastliðið vor, þegar enn var leyfilegt að selja snyrtivörur með þessum bönnuðu efnum, fundum við þau í sólvarnarefnum sem framleidd voru utan Evrópusambandsins.“

Þegar slíkar vörur finnast í verslunum óskar Umhverfisstofnun eftir förgun þeirra. Viðurlög eru áminningar og jafnvel dagsektir, að sögn Gunnlaugar.

Hún tekur það fram að stofnunin hafi ætlað að beina því til neytenda að þeir gæti sín en viðurkennir að slíkt geti verið erfitt fyrir þá. „Þetta er auðvitað ruglingslegt þegar sum paraben eru bönnuð en önnur ekki. Við hefðum sennilega mátt vera duglegri við að koma upplýsingum um þessi mál til innflytjenda."

 

Bönnuð paraben	Leyfileg paraben
Benzylparaben Isobutylparaben Isoprobylparaben Pentylparaben Phenylparaben	Butylparaben Ethylparaben Methylparaben Propylparaben