Jón Daði hetja Viking í fyrsta leik

Selfyssingurinn Jón Daði Böðvarsson var hetja Viking í fyrstu umferð norsku úrvalsdeildarinnar í fótbolta í kvöld þegar hann skoraði bæði mörk liðsins í 2-2 jafntefli á móti Rosenborg á útivelli.

Jón Daði kom inná sem varamaður á 74. mínútu leiksins þegar staðan var 2-0 fyrir Rosenborg og allt leit út fyrir tap hjá Íslendingaliðinu. Jón Daði minnkaði muninn á 87. mínútu og jafnaði síðan metin á lokamínútu leiksins.

Indriði Sigurðsson, Sverrir Ingi Ingason, Björn Daníel Sverrisson og Steinþór Freyr Þorsteinsson voru allir í byrjunarliði Viking og allir nema Steinþór spiluðu allan leikinn en Steinþór var tekinn af velli í lokin.

Mikkel Diskerud og Mikael Dorsin komu Rosenborg í 2-0 með mörkum með fimm mínútna millibili á 63. og 68. mínútu.