Fimmtíu listamenn sameinast fyrir hjartveika stúlku

Tónleikar til styrktar tveggja ára stúlku sem hefur þurft að gangast undir margar erfiðar hjartaaðgerðir, verða í Dómkirkjunni í kvöld. Yfir fimmtíu listamenn sameina þar krafta sína og eru flestir vinir litlu hetjunnar.

Ljóti kór er á meðal þeirra sem koma fram í kvöld en söngvararnir þekkja margir til Matthildar Haraldsdóttur, sem fæddist með afar sjaldgæfan og flókinn hjartagalla. Mikið hefur verið lagt á þessa litlu stúlku sem gekkst nú síðast undir aðgerðir á sjúkrahúsi í Munchen í júlí og ágúst.

„Matthildur er búin að vera í rúman mánuð á spítalanum núna. Þetta er búið að vera hörð barátta en síðastliðna daga hefur henni farið fram, það hafa verið hæg framfaraskref svo við erum náttúrulega jákvæð og vonum það besta," segir Guðbjörg Sandholt, fjölskylduvinur í Salzburg.

Ljóst er að bataferlið getur tekið langan tíma og fyrirséð að foreldrar Matthildar, tónlistarfólkið Harpa Þorvaldsdóttir og Haraldur Ægir Guðmundsson verði fjarverandi frá vinnu í dágóðan tíma. Vinir fjölskyldunnar ákváðu vegna þessa að efna til tónleika til þess að styðja við bakið á ungu fjölskyldunni sem búsett í Salzburg.

„Matthildur er lítil ofurstelpa, hún smitar alla með krafti sínum, gleði og orku þannig að maður heillast af. Þeir sem kynnast henni, sem eru ekki mjög margir Íslendingar því þau hafa ekki komist heim með hana, en við sem höfum verið úti verðum fljótt og vel ástfangin af henni þannig að styðja þetta barn gerum við með glöðu geði," segir Elfa Lilja Gísladóttir, fjölskylduvinur.

Tónleikarnir verða í Dómkirkjunni og hefjast klukkan átta.

„Aðgangseyrir, hann var svolítið mikið í umræðunni. Við erum að miða við 2000 kr en við viljum frekar að fólk komi, það er aðalatriðið. Hvort að það er ekkert eða minna eða meira, það er alveg frjálst," segir Elfa

Elfa hvetur sem flesta til að koma enda væn og lifandi tónlistarveisla í vændum.

Þeir sem ekki komast á tónleikana í kvöld en vilja styrkja Matthildi og fjölskyldu er bent á reikningsnúmerið 0159-05-403600 Kt. 160580-5429.