Reglurnar þurfa að vera alþjóðlegar

Pétur Blöndal hefur lagt fram svipaðar tillögur á Íslandi og samþykktar voru um helgina á þingi Öryggis- og samvinnustofnunar Evrópu. Tillögurnar miða að því að koma í veg fyrir hringferla peninga með raðeignarhaldi og innistæðulausa eignabólu fyrirtækja. Pétur segir markmið tillagnanna ekki ná fram að ganga nema þær séu samræmdar meðal allra landa.

„Það er eignarhald milli hlutafélaga um allan heim og ef við myndum setja svona reglur bara á Íslandi þá værum við einfaldlega að loka á tengsl íslenskra félaga við erlend félög," segir Pétur. Við verðum því í raun að bíða með að setja slíkar reglur hérlendis þar til við sjáum hvernig gengur að koma þeim í gegn erlendis.

Pétur náði eyrum aðildarríkja Öryggis- og samvinnustofnunar Evrópu um helgina. Samþykkt var ályktun um að koma í veg fyrir hringferla peninga með raðeignarhaldi. Það miðar í raun að því að koma í veg fyrir að félög blási út án þess að nokkur innistæða sé fyrir því.

„Þetta er meinsemd sem ég tel að við verðum að laga. Við sáum bara hvernig þetta var á Íslandi, allt hrundi eins og spilaborg og það var ekkert inni í þessu," segir Pétur.