Bíó og sjónvarp

Netflix beinir eyrum sínum að Akureyri

Tryggvi Páll Tryggvason skrifar
Fulltrúi almannavarna sá til þess að allt færi að settum reglum í Hofi um helgina.
Fulltrúi almannavarna sá til þess að allt færi að settum reglum í Hofi um helgina. Vísir/Tryggvi

Bandaríska streymisveitan Netflix sendir nú verkefni í gríð og erg til Akureyrar. Sinfóníuhljómsveitin Sinfonia Nord á Akureyri, er ein af fáum, ef ekki sú eina í heiminum, sem getur sinnt kvikmyndatónlistarverkefnum þessa dagana vegna kórónuveirufaraldursins.

Miðstöð Sinfonia Nord er í Menningarhúsinu Hofi á Akureyri þar sem hljóðfæraleikarar hafa staðið í ströngu alla helgina, að taka upp kvikmyndatónlist fyrir bandarísku streymisveitinu Netflix. Verkefnin hreinlega hrúgast inn.

„Við eiginlega trúum því ekki hvað er að gerast. Við virðumst vera eina sinfónuhjómsveitin í heiminum sem getur veitt þessa þjónustu núna, ekki það að við vorum löngu byrjaðir á því. Núna erum við að taka upp tónlist fyrir þriðju Netflix-kvikmyndina okkar í röð,“ segir Þorvaldur Bjarni Þorvaldsson, framkvæmdastjóri hljómsveitarinnar.

Þorvaldur Bjarni fylgist með upptökunum.Vísir/Tryggvi

Það flækir málin að ekki mega vera fleiri en 20 í sama rýminu vegna samkomubannsins auk þess sem að Netflix krefst ýtrustu sóttvarna. Því þurfti að skipta hljómsveitinni upp í minni einingar auk þess sem að enginn komst inn í Hof nema fá grænt ljós frá hjúkrunarfræðingi.

Hljóðfæraleikararnir þurftu að vera með grímu í almennum rýmum og líklega hefur það ekki oft gerst áður að sinfóníuhljómsveit hafi starfað undir vökulum augum fulltrúa almannavarna, sem gætti þess að allt færi fram samkvæmt reglum. En tónlistin hentar þessum varúðarráðstöfunum.

„Við erum að taka upp kvikmyndatónlist fyrir dramatískan þátt, krimma, og þetta er bara svolítið eins og að vera inn í því,“ segir Þorvaldur Bjarni.

Framundan eru minnst þrjú verkefni og Netflix virðist ætla að grípa gæsina eftir að hafa kynnst Sinfoniu Nord í fyrri verkefnum, í febrúar var meðal annars tilkynnt að hljómsveitin myndi taka upp tónlistina í Eurovison-mynd Will Ferrel, þar sem Ísland kemur mjög við sögu.

„Við erum komin með olnbogann inn, þá vill svo til að fólk lítur til okkar þegar það fattar að á Íslandi er kannski langöruggast að vera á meðan á þessu stendur og þess vegna getum við veitt þjónustuna,“ segir Þorvaldur Bjarni en greint hefur verið frá því að Netflix hafi sett nánast alla sjónvarps- og kvikmyndaframleiðslu á ís, nema í tveimur löndum, Suður-Kóreu og Íslandi, vegna árangurs þeirra í baráttunni gegn kórónuveirufaraldrinum.

Passað var upp á að nægjanlegt bil væri á milli hljóðfæraleikara. Og fulltrúi almannavarna var aldrei langt undan.Vísir/Tryggvi

Og framkvæmdastjórinn vonar að þessi törn skili verkefnum til frambúðar, sem hún virðist þegar vera farin að gera.

„Ég var að fá póst núna í gærkvöldi þar sem var verið að spyrja hvort mögulegt væri að fá Hof frá 4. maí þangað til í byrjun september, alla daga.“

Þannig að það verður nóg að gera hjá ykkur?

„Það lítur út fyrir það að það verði en þetta er ekki í hendi en ef svo erum við akkúrat kominn á þann stað sem við vildum, að vera með eitt verkefni í viku.“

Hof þykir henta einstaklega vel til þess að taka upp kvikmyndatónlist.Vísir/Tryggvi


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.