Jenson Button á Íslandi

"Jenson Button formúlukappi kom hingað kortér fyrir níu í fyrradag," segir Davíð Jóhannsson, framkvæmdastjóri Suðurflugs á Keflavíkurflugvelli. "Við þjónustum litlar vélar en hér lenda þær oftast til að fá eldsneyti í flugi milli Bandaríkjanna og Evrópu. Stundum eru þekkt nöfn innanborðs því fólk sem millilendir hér þarf ekki að fara inn í flugstöðvarbygginguna. Við kunnum ekki alltaf deili á þeim sem lenda hjá okkur en allir þurfa að skilja eftir skýrslu með nafni, fæðingardegi og númeri á vegabréfi og við föttuðum til dæmis í gær þegar við sáum nafnið Jenson Button á blaði að við hefðum hitt formúlukappann fræga," segir Davíð en Jenson Button krækti sér í þriðja sæti Formúlu 1 keppninnar í ár. "Niki Lauda, fyrrum heimsmeistari Formúlu 1, millilendir líka stundum hér því hann á sitt eigið flugfélag og bræðurnir heimsfrægu Michael og Ralf Schumacher komu einu sinni við hér hjá okkur." Þegar Davíð er inntur eftir fleiri frægum einstaklingum sem hafa lent hjá Suðurflugi kemur ýmislegt í ljós. "John Travolta kom hérna í fyrra en við hittum reyndar bara konuna hans því hann svaf um borð meðan verið var að skipta um bensín á vélinni. Bandaríski leikarinn Anthony Edwards sem lék þunnhærða lækninn, dr. Green, í Bráðavaktinni hefur nokkrum sinnum farið hérna í gegn en konan hans er skandinavísk og þau fljúga því oft á milli Bandaríkjanna og Evrópu. Bakraddasöngkonur Tinu Turner komu svo við hér á Evróputúrnum hennar í fyrra og bandaríska söngkonan Paula Abdul sem dæmdi í Idolinu birtist hér í vetur." Íslandsvinurinn Mick Jagger hefur líka stundum nýtt sér þjónustuna. "Þeir sem koma inn til okkar fá að vera í friði fyrir ágangi fjölmiðla og aðdáenda. Hérna fá þeir sér bara kaffi og eitthvað matarkyns eða fara á salernið á meðan við setjum eldsneyti á vélarnar." Auk þess að þjónusta einkaþotur frægra einstaklinga aðstoðar Suðurflug oft á tíðum við sjúkraflug. "Þá eru ýmist læknar, sjúklingar, eða ástvinir sjúklinga um borð. Við höfum stundum lent í því að þurfa að fara með sjúklinga til Reykjavíkur á sjúkrahús áður en fluginu er haldið áfram og upplifum því ýmislegt annað í vinnunni en að berja stjörnurnar augum."