Staðan er nú 2-1 fyrir Martin | Besti nýliði vikunnar í NEC

Martin Hermannsson var valinn besti nýliði vikunnar í NEC-deildinni í bandaríska háskólakörfuboltanum í gær en þetta er í annað skiptið sem KR-ingurinn fær þessi verðlaun.

Martin var í stóru hlutverki í tveimur útisigrum LIU Brooklyn í vikunni og var með 12,5 stig, 5,0 fráköst og 4,0 stoðsendingar að meðaltali í leik auk þess að hitta úr 54 prósent skota sinna utan af velli.

Martin skoraði öll tólf stigin sín og gaf þrjár af fimm stoðsendingum sínum í seinni hálfleik í 63-62 endurkomusigri LIU Brooklyn á Roberto Morris skólanum á fimmtudaginn var.

Tveimur dögum síðar var Martin með 13 stig, 5 fráköst og 3 stoðsendingar í 79-74 sigri á Saint Francis University í framlengdum leik. Martin setti meðal annars niður mikilvægt þriggja stiga skot í lok venjulegs leiktíma.

Elvar Már Friðriksson var fyrsti Íslendingurinn í LIU Brooklyn liðinu til að fá þessa viðurkenningu í vetur en síðan hefur Martin fengið hana tvisvar sinnum.

Martin er annar stigahæsti leikmaður LIU Brooklyn á tímabilinu með 10,3 stig í leik en hann er einnig með 3,8 fráköst og 3,6 stoðsendingar að meðaltali í leik á sínum fyrsta vetri í bandaríska háskólaboltanum.

LIU Brooklyn hefur nú unnið fjóra leiki í röð og er komið upp í 4. sætið í NEC-deildinni. Næsti leikur er á móti Mount St. Mary's á fimmtudaginn.