Skorar á eldri leikmenn KR að taka eitt tímabil í viðbót

Böðvar Guðjónsson, formaður körfuknattleiksdeildar KR, skorar á eldri leikmenn KR-liðsins að taka að minnsta kosti eitt tímabil viðbót í baráttunni með liðinu í Dominos-deild karla.

Böðvar var gestur í Sportinu í dag í gær þar sem hann ræddi meðal annars um heiðursmannasamkomulag sem hann vill gera á milli félaganna, hækkun leikmanna í verði og margt, margt fleira.

Hann var svo spurður út í það hvort að hann þyrfti að fara hugsa allt upp á nýtt en lykilmenn KR-liðsins eru komnir á sín eldri ár. Þar má nefna einn besta körfuboltamann Íslandssögunnar, Jón Arnór Stefánsson, og jafnaldra hans, uppeldisbræður og landsliðsfélaga Helga Má Magnússon og Jakob Örn Sigurðarson.

„Við munum setjast niður með strákunum og stelpunum í næsta mánuði. Ég hef fulla trú á því að það vilji allir taka þátt í þessu verkefni á næsta ári að gera atlögu að titlinum. Síðasti leikur í meistaraflokki karla var á Hlíðarenda og svo var mótið blásið af,“ sagði Böðvar í þættinum.

„Þeir sem eru að fara enda sinn feril, ég hugsa þeir vilji fá að kvitta fyrir þetta og taka þátt í úrslitakeppni í síðasta skipti. Ég hef ekki trú á neinu öðru en að leikmenn KR standi saman og taki einn slag fyrir klúbbinn sinn á næsta ári.“ 

En þeir yngjast ekki sagði Henry Birgir.

„Nei, þeir gera það ekki. Þeir hugsa bara vel um sig. Það er alltaf hægt að nota þá. Þá verður hægt að nota þá í fimmtán til tuttugu mínútur. Ekki 25 og 30 mínútur. Þessir elstu leikmenn okkar voru komnir í hörkugír í lokin.“