Bæjaryfirvöld losi þau undan tóbaki

Krakkarnir í 7. M í grunnskólanum í Þorlákshöfn hafa skorað á bæjaryfirvöld í Ölfusi að gæta þess að tóbaksnotkun við byggingar og á lóðum sveitarfélagsins trufli ekki þá sem ekki nota tóbak.

„Við tókum ágætlega í það og höfum falið áhaldahúsinu að skoða málið,“ segir Ólafur Örn Ólafsson bæjarstjóri sem kveður áskorun skólakrakkanna eiga sér upphaf í umhverfisdegi sem var 25. apríl.

„Þessi bekkur í grunnskólanum hafði það verkefni að fara á alla staði í bænum og skoða hvernig tóbaksvarnarmálum væri háttað. Þau sendu áskorun á bæjarstjórnina meðal annars um það að færa tóbaksstauta lengra frá anddyrinu í íþróttamiðstöðinni og fleiri stöðum. Þannig að þau þurfi að minnsta kosti ekki að verða fyrir mengun frá tóbaki þar sem þau fara um,“ segir Ólafur sem kveður hins vegar geta verið tvíeggjað að færa vindlingastaukana.

„Þá lenda stubbarnir bara í anddyrinu því fólk eltir því miður ekki dallana. Þannig að það getur verið erfitt að verða við þessu en það er verið að skoða það,“ segir bæjarstjórinn.

Bæjarráðið fyrir sitt leyti þakkaði nemendum 7. M fyrir þarfar ábendingar og minnti á að reykingar eru bannaðar á skólalóðum og í og við íþróttamannvirki bæjarins. - gar