Enginn bensínstyrkur öryrkja

„Það eru tvær lagabreytingar til sparnaðar í fjárlagafrumvarpi ríkisstjórnarinnar,“ segir Helgi Hjörvar, þingmaður Samfylkingarinnar. „Önnur er áframhaldandi skerðing á vaxabótum. Hin er afnám bensínsstyrks til hreyfihamlaðra.“ Í fjárlagafrumvarpinu er lagt til spara 720 milljónir með því að afnema styrk vegna reksturs bifreiða. Um 400 milljónum af því verður varið til að hækka tekjutryggingarauka. Einnig verður auknum fjármunum veitt í endurhæfingu öryrkja. „Það er að verða mjög sérkennilegt hvernig ríkisstjórnin beinir sínum litlu aðhaldsaðgerðum alltaf að sama hópnum. En það er ekki síður áhyggjuefni sú breyting á hugarfari sem þetta lýsir. Því að styrkir til bifreiðakaupa og bensínstyrkir voru í upphafi hugsaðir sem stuðningur við fatlaða til að komast í atvinnulífið og komast í lífið.“ Ragnar Gunnar Þórhallson, formaður Sjálfsbjargar segir að með þessu sé verið að draga úr greiðslu til þeirra fatlaðra sem eru á vinnumarkaðnum, eina ferðina enn. Þar vísar hann til þess að bílakaupastyrkur hafi í raun verið minnkaður árið 2004 með því að lengja þann tíma sem öryrkja þurfa að eiga bifreiðar. Þá hafi heilbrigðisráðherra breytt reglum um sjúkraþjálfun, þannig að þeir öryrkjar sem hafi tekjur þurfi að greiða aukinn hluta af kostnaði við sjúkraþjálfun. „Bensínstyrkur er í mörgum tilfellum eini styrkurinn sem fatlaðir á vinnumarkaði hafa fengið“, segir Ragnar. „Síðan er hluti af þessum peningum settur í tekjutryggingaauka, sem þeir fá greitt sem eru ekki í neinni vinnu.“ Með þessu, segir Ragnar, er verið að draga úr hvatanum til að öryrkjar fari á vinnumarkað. Jón Kristjánsson heilbrigðisráðherra segir þetta vera kerfisbreytingu. „Við leggjum niður bensínstyrkinn sem kemur ekki nema sumum til góða.“ Á móti komi tekjurtrygginarauki og aukinn útgjöld vegna endurhæfingar sem sé mun almennari styrkur. „Fyrsta umræða um fjárlagafrumvarpið verður á fimmtudag og þá mun ég gera grein fyrir afstöðu okkar í þessu máli,“ segir Jón. „Í framhaldinu verður kallað eftir áliti, eins og venjan er til, við aðila sem málið varðar.