Örflögubylting í Borgarbókasafni

Tæknibylting verður í Borgarbókasafni á næstu vikum þegar strikamerkjum og þjófavarnarræmum, sem nú prýða hvert einasta gagn safnsins, verður skipt út fyrir örflögur. Þetta er mikil hagræðing fyrir Borgarbókasafn sem þarf því ekki að þjófaverja bækur eða önnur gögn eins og gert hefur verið hingað til.

Örflögurnar gera það að verkum að útlán og skil ganga mun hraðar og einfaldar fyrir sig en áður. Sem dæmi þá verður hægt að lána út margar bækur í einu í sjálfsafgreiðsluvélunum í stað þess að þurfa að renna hverri bók í gegn eins og nú er gert.  Það er finnska fyrirtækið P.V. - Supa sem framleiðir örflögurnar en fyrirtækið sérhæfir sig í sjálfsafgreiðslulausnum fyrir bókasöfn. Borgarbókasafnið er fyrsta bókasafnið á Íslandi sem tekur upp þessa tækni.

Guðríður Sigurbjörnsdóttir, verkefnastjóri á Borgarbókasafninu, segir að þjófnaður sé ekki ekki algengur á safninu. Örflögurnar spari hins vegar talsverða vinnu þar sem ekki þurfi að þjófverja hverja einastu bók.

„Örflagan mun einfalda útlán töluvert og þetta mun ganga mun betur og hraðar fyrir sig í sjálfsafgreiðslu en áður,“ segir Guðríður. Alls eru um 500 þúsund einstök af bókum og öðrum gögnum í sex söfnum Borgarbókasafnsins í Reykjavík. Á næsta vikum verður farið í það af krafti að örflögumerkja gögn safnsins.

„Ég geri ráð fyrir að okkur takist að örflögumerkja 2-3000 bækur á klukkustund og því gætum við náð 25-30 þúsund á dag. Þetta á eftir að ganga hratt fyrir sig,“ segir Guðríður.

Á meðan breytingarnar standa yfir er nauðsynlegt að loka söfnunum Borgarbókasafns. Söfnin verða því lokuð sem hér segir:

Aðalsafn - 18.-23. september

Ársafn og Sólheimasafn - 24.-27. september

Foldasafn og Kringlusafn - 30. september - 4. október

Gerðubergssafn - 7.-11.  október