Óvíst hvort hún tekur gildi

Óvíst er hvort hin nýja stjórnarskrá Evrópusambandsins, sem undirrituð var með mikilli viðhöfn í morgun, tekur nokkurn tíma gildi. Bæði Bretar og Danir eru líklegir til að fella málið í þjóðaratkvæðagreiðslu. Leiðtogar Evrópusambandsríkja stigu á stokk, hver á fætur öðrum í morgun og settu nöfnin sín við stjórnarskrána; á sama stað og leiðtogar sex Evrópuríkja mörkuðu upphaf Evrópusamrunans með því að skrifa undir Rómarsáttmálann árið 1957. Stjórnarskráin er viðleitni til að auka samvinnu ESB ríkja og tryggja lýðræði innan stofnana samtakanna. Hins vegar gætu málin vel æxlast svo að þessi mikla athöfn í morgun sé ekki pappírsins virði. Eiríkur Bergmann Einarsson, prófessor í stjórnmálafræði við Háskóla Íslands segir með öllu óvíst að aðildarríkin samþykki stjórnarskrána eins og hún er nú og til að mynda séu bæði Danir og Bretar líklegir til að hafna henni. Gerist það sé komið upp óvissuástand. Eiríkur segir að átök og deilur liggi í eðli Evrópusambandsins og því sé ekki óeðlilegt að tekist sé hressilega á um stjórnarskrána og önnur málefni. Evrópusambandið sé vettvangur fyrir ríkin til að greina úr ágreiningi sínum og því sé eðlilegt að ágreiningur sé hið stöðuga ástand innan Evrópusambandsins.