Bára Krist­björg til liðs við Kristian­stad í Sví­þjóð

Bára Kristbjörg vakti mikla athygli sem einn af sérfræðingum Pepsi Max Markanna í sumar. Eftir að Íslandsmót karla og kvenna voru blásin af var Bára ráðin þjálfara Augnabliks, systurfélags Breiðabliks, í Lengjudeild kvenna. 

Greint var frá þessu á Facebook-síðu knattspyrnudeildar Breiðabliks í dag.

Hún mun þó ekki stýra félaginu næsta sumar þar sem hún er á leið til Svíþjóðar. Bára Kristbjörg verður sjötti Íslendingurinn á launaskrá félagsins. Hún samdi við félagið til eins árs.

„Þetta var nú ekki flóknara en það að Beta [Elísabet Gunnarsdóttir] hafði samband og spurði hvort ég hefði áhuga,“ sagði Bára í stuttu spjalli við Vísi um hvernig það hefði komið til að hún væri nýr þjálfari U17 og U19 ára liðs Kristianstad.

„Ég vil bara koma á framfæri miklu þakklæti til stjórnar Breiðabliks/Augnabliks og hvernig hún tók í það þegar að mér var boðin þjálfarastaða erlendis. Ég var auðvitað nýbúin að ráða mig hjá þeim og þetta var alls ekki í kortunum þegar ég réði mig,“ segir Bára um vistaskiptin.

„Svo kemur þessi staða skyndilega upp og eðlilega var þetta freistandi fyrir mig persónulega. Stjórn Augnabliks/Breiðabliks hefur stutt algjörlega við bakið á mér í þessu ferli og það er alls ekki sjálfsagt í svona málum. Í framhaldinu langar mig að óska Breiðablik/Augnablik alls hins besta á komandi tímabili,“ bætti hin 31 árs gamla Bára Kristbjörg við að endingu.

Eins og áður sagði er Bára að fara í mikið Íslendingalið. Elísabet er sem fyrr aðalþjálfari liðsins, Björn Sigurbjörnsson er aðstoðarþjálfari liðsins og yfirmaður akademíunnar. Kristín Hólm Geirsdóttir er styrktarþjálfari hjá félaginu.

Þá leika þær Sif Atladóttir og Svava Rós Guðmundsdóttir með liðinu. Kristianstad tryggði sér sæti í Meistaradeild Evrópu á næstu leiktíð og því bjartir tímar framundan hjá liðinu.