Kristján Danaprins smitaður af veirunni

Kristján, sem er fimmtán ára sonur krónprinsins Friðriks og Maríu krónprinsessu, er nú í einangrun heimili fjölskyldunnar í Amalíuborg, hvar systkini hans og foreldrar eru einnig í sóttkví.

Kristján greindist með veiruna eftir að smit kom upp í skóla hans í gær. Fram kemur í tilkynningu að hann hafi ekki verið í samskiptum við neinn í konungsfjölskyldunni í gær eða síðustu daga fyrir utan foreldra sína og systkini.

Kristján er fyrsti konungborni Daninn sem greinist með veiruna, að því er danskir fjölmiðlar komast næst. Veiran hefur þó komist í tæri við annað kóngafólk í Evrópu síðustu mánuði; Karl og Vilhjálmur Bretaprinsar smituðust báðir í mars og nýlega greindust Karl Filippus Svíaprins og Sofía prinsessa með veiruna.