Innlent

Setja lög á verkfall flugvirkja Landhelgisgæslunnar

Tryggvi Páll Tryggvason og Sunna Karen Sigurþórsdóttir skrifa
Áslaug Arna Sigurbjörnsdóttir dómsmálaráðherra ræddi við fréttamenn í kuldanum fyrir utan Ráðherrabústaðinn klukkan ellefu í morgun.
Áslaug Arna Sigurbjörnsdóttir dómsmálaráðherra ræddi við fréttamenn í kuldanum fyrir utan Ráðherrabústaðinn klukkan ellefu í morgun. Vísir/Vilhelm

Áslaug Arna Sigurbjörnsdóttir dómsmálaráðherra hefur lagt fram frumvarp um lög til að binda enda á verkfall flugvirkja hjá Landhelgisgæslu Íslands.

Þetta sagði Áslaug Arna í viðtali við Sunnu Karen Sigþórsdóttur fréttamann fyrir utan Ráðherrabústaðinn nú fyrir stundu, þar sem ríkisstjórnin fundar.

„Það er auðvitað þannig að starfsemin varðar almannaöryggi og verður að komast í eðlilegt horf án tafar,“ segir Áslaug Arna. Hún segir frumvarpið feli í sér að flugvirkjar fái frelsi til þess að klára samninga fyrir 4. janúar, annars fari deilan fyrir Gerðardóm. Hún segir fulla samstöðu hafa verið um þessar aðgerðir í ríkisstjórn. 

Áslaug Arna segir samninganefnd ríkisins hafa komið mikið til móts við samninganefnd flugvirkja.

„Þeir eru með tengingu við samning Icelandair þar sem að Icelandair fékk ákveðna hagræðingu í síðustu samningum þannig að það er algjört lágmark að Landhelgisgæslan fái sambærilega hagræðingu.“

Hvenær munu flugvirkjar þá taka til starfa aftur?

„Vonandi bara á eftir.“

Kjaradeilan er í algjörum hnút eftir að samninganefnd Flugvirkjafélags Íslands hafnaði sáttatillögu ríkissáttasemjara á tíu tíma maraþonfundi í Karphúsinu í gær. Tillagan fól í sér eins árs framlengingu á gildandi kjarasamningi auk sömu hækkana og flugvirkjar Icelandair hafa fengið. Flugvirkjar höfnuðu tillögunni en þeir vildu semja til þriggja ára.

Aðalsteinn Leifsson, ríkissáttasemjari sagði í gær í samtali við Vísi að ekki stæði til að boða til nýs fundar í kjaradeildunni þar sem að honum virtist ekki vera neinn grundvöllur til viðræðna, eftir að sáttatillaga hans bar ekki árangur.

Sex af átján flugvirkjum Gæslunnar eru í verkfalli sem staðið hefur frá 5. nóvember. Engin þyrla hefur verið til taks hjá Landhelgisgæslunni frá því eftir miðnætti á miðvikudag vegna reglubundinnar skoðunar einu starfhæfu þyrlu Gæslunnar. Ljóst er að engin þyrla verður tiltæk að minnsta fram á helgina.

Harka virðist hafa hlaupið í kjaradeiluna á undanförnum sólarhring en Landhelgisgæslan gaf út tilkynningu í morgun þar sem fram komað viðhald á TF-GRO, þyrlu Gæslunnar, hafi gengið mun hægar en vonir voru bundnar við vegna þess að ekki hafi allir flugvirkjar, sem Gæslan telur að eigi að vera við vinnu, mætt til að sinna því.

Áslaug Arna skrifar sjálf um ákvörðunina á Facebook:

Landhelgisgæsla Íslands er ein af grunnstoðum öryggis- og almannavarna í landinu. Þörfin fyrir öfluga björgunarþjónustu er hvað brýnust á þessum tíma árs þegar dimmasta skammdegið fer í hönd. Hættulegar veðurfarslegar aðstæður geta skapast víða um land og þá ekki síst fyrir sjófarendur á miðunum í kringum landið.

Þyrlur Landhelgisgæslunnar eru ekki aðeins nauðsynlegar við leit og björgun á sjó og landi heldur sinna þær einnig sjúkraflugi og eru þannig einnig mikilvægur hlekkur í heilbrigðis- og öryggisþjónustu fyrir allan almenning.

Verkfall flugvirkja hefur stefnt þessu öryggi í mikla tvísýnu.

Staðan er óviðunandi og ég tel ekki rétt að ein stétt hjá Landhelgisgæslunni geti haft þessi gífurlegu áhrif á öryggismál þjóðarinnar, einkum og sér í lagi þegar haft er í huga að öðrum mikilvægum starfsmönnum stofnunarinnar er óheimilt að fara í verkfall með vísan til almannahagsmuna.

Samninganefnd ríkisins hefur boðið flugvirkjum Gæslunnar nýjan samning með sömu hækkunum og aðrir hafa fengið en ekki samþykkt eldra fyrirkomulag með tengingu við kjarasamning Icelandair. Þessar viðræður hafa nú siglt í strand og flugvirkjar hafa hafnað sáttatillögu ríkissáttasemjara um eins árs samning.

Kjaradeilan varðar almannahagsmuni og almannaöryggi. Starfsemi flugdeildar Landhelgisgæslunnar verður einfaldlega að komast í eðlilegt horf án tafar.

Ég hef því lagt það til og ríkisstjórnin hefur samþykkt að leggja fyrir Alþingi frumvarp að lögum til að stöðva verkfallið og gerðardómi verði falið að ákveða kaup og kjör flugvirkja hjá Landhelgisgæslunni hafi samningar ekki tekist fyrir 4. janúar nk. Einnig verður gerðardómi ætlað að taka til meðferðar útfærslu á tengingu kjarasamnings flugvirkja við aðrar sambærilegar starfsstéttir á almennum vinnumarkaði.

Allt er þetta skýrt mun nánar í greinargerð með frumvarpinu sem ég mun mæla fyrir í þinginu í dag.


Tengdar fréttir

Flugvirkjar buðu þriggja ára samning

Samninganefnd Flugvirkjafélag Íslands bauð samninganefnd ríkisins samning með tengingu við aðalkjarasamning félagsins til þriggja ára í kjaradeilu flugvirkja Landhelgisgæslunnar við íslenska ríkið, samkvæmt upplýsingum frá formanni félagsins.

Dómsmálaráðherra efast um verkfallsrétt flugvirkja

Önnur þyrla Landhelgisgæslunnar var komin í margra vikna viðhald þegar verkfall flugvirkja Gæslunnar hófst. Hin á að fara í reglubunda skoðun eftir miðbætti annað kvöld sem tekur að minnsta kosti tvo daga og þá verður engin björgunarþyrla til staðar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.