„Ummerkin voru, ef ég orða það pent, svakaleg“

„Mér var vísað þarna inn í eitt herbergið og það var vart hægt að opna hurðina fyrir drasli. Og þar blasti við mjög ófögur sjón. Blóð úti um allt og allt var á tjá og tundri,“ segir Einar Guðberg Jónsson lögreglumaður sem var með þeim fyrstu sem komu að karlmanni látnum í íbúðarhúsnæði við Dalshraun í Hafnarfirði árið 2009. Fjallað var um málið í sjónvarpsþáttunum Ummerkjum á Stöð 2 í gærkvöld.

Bjarki Freyr Sigurgeirsson hafði þá ráðið félaga sínum, Braga Friðþjófssyni, bana eftir að hafa barið hann ítrekuðum höggum með borðplötu og vöfflujárni. Mennirnir tveir voru neyslufélagar en Bragi hafði komið í herbergi Bjarka Freys þetta kvöld til þess að sækja úlpu sem hann hafði skilið eftir degi áður.

Hélt hann sæi Köngulóarmanninn

Þeir sátu fyrst að sumbli um stund í herbergi nágranna Bjarka áður en Bragi stóð upp og sagðist þurfa að fara. Þeir gengu tveir saman inn í herbergi Bjarka og í skýrslutöku lýsti Bjarki Freyr því að þeir hefðu verið góðir saman, haldið utan um hvorn annan og verið vinir. Allt þar til þeir komu inn í dyragættina, en þá var eins og eitthvað æði hefði gripið um sig.

„Ég sé að hann er bara alblóðugur, bara buxurnar hans og þær eru allar alveg gegnsósa af blóði og hann segir að gaurinn þarna inni hjá sér hafi eitthvað verið að leika Spiderman. Það var bara eins og sláturhús. Löggan hún spurði hvort það hefði verið skotvopn, þetta var það mikið,“ segir nágranni mannsins sem kom að mönnunum tveimur.

„Hann var vægast sagt í mjög annarlegu ástandi, bæði af áfengi og lyfjaneyslu,“ segir Einar Guðberg lögreglumaður. „Hann gaf svo sem engar skýringar þarna í upphafi annað en að eitthvað hefði komið uppá og orðið hræddur, og gengið úr skugga um að viðkomandi kæmi ekki á eftir honum,“ bætir hann við.

Lét höggin dynja ítrekað

Rannsóknarlögreglumaðurinn og blóðferlasérfræðingurinn Ragnar Jónsson hjá tæknideild lögreglunnar var kallaður á vettvang, líkt og almennt þegar svona mál koma upp.

„Ummerkin voru, ef ég orða það pent, svakaleg. Það voru mjög sterkar vísbendingar um að ekki hafi bara eitt áhald verið notað heldur tvö,“ segir Ragnar. Rannsóknin leiddi í ljós að viðkomandi hafði látið höggin dynja með ellefu kílóa tréborði og tveggja kílóa vöfflujárni.

„Það voru nokkur lög af blóði sem segir okkur að árásin á látna var ítrekuð. Það var ítrekað verið að ganga í skrokk á honum með áhöldum,“ segir Ragnar.

„Að nota fleiri en eitt áhald er að sýna svo mikinn ásetning hjá viðkomandi. Það var ekki nóg að hafa lamið með þessu heldur þurfti líka að nota eitthvað annað og jafnvel eitthvað þyngra. Það vegur þyngst í þessu, þessi ásetningur að bana viðkomandi.“

Bjarki Freyr játaði að hafa ráðið félaga sínum bana en neitaði að hafa notað vöfflujárnið. Vöfflujárnið var þó alblóðugt og nánast komið í mél. Hann var samvinnuþýður við lögreglu og ákvað að una 16 ára fangelsisdómi Héraðsdóms Reykjaness og áfrýjaði því ekki. Bragi var 31 árs þegar hann lést.

Ítarlega var fjallað um málið í Ummerkjum á Stöð 2 í gærkvöld en hluta úr þættinum má sjá í spilaranum hér fyrir neðan.