„Vel til fundið“ hjá flug­hernum að nefna flug­vél eftir Reykja­vík

Guðlaugur Þór Þórðarson utanríkisráðherra segir það „sérlega vel til fundið“ hjá breska flughernum að nefna nýja eftirlitsflugvél sína eftir Reykjavík. Þannig undirstriki herinn þýðingu Íslands í baráttunni um Atlantshafið og minnist þeirra Íslendinga sem létust í seinni heimstyrjöldinni.

Líkt og Vísir greindi frá fyrr í dag hefur ný eftirlitsflugvél konunglega breska flughersins verið nefnd Andi Reykjavíkur, eða Spirit of Reykjavík. Vélin er af gerðinni Poseidon MRA 1.

Þessu fagnar Guðlaugur Þór í færslu á Facebook-síðu sinni í kvöld. „Bretland og Ísland hafa lengi átt gott samstarf á sviði öryggis- og varnarmála á vettvangi Atlantshafsbandalagsins og á undanförnum árum hefur tvíhliða samstarf ríkjanna á því sviði aukist, sbr. samkomulag ríkjanna frá 2019 um samvinnu á sviði eftirlits í lofti og á sjó, hryðjuverkavarna, netöryggis og leitar og björgunar,“ skrifar ráðherrann og vísar í tilkynningu á vef stjórnarráðsins frá undirritun samkomulags ríkjanna frá 2019.

„Eftirlitsflugvélar af þessu tagi geta einmitt nýst við leit og björgun og aukið þannig öryggi sjófarenda,“ skrifar Guðlaugur ennfremur.