Atvinnulíf

„Leyndarmál Rauðhólsgleðinnar“ virkar

Rakel Sveinsdóttir skrifar
Guðrún Sólveig leikskólastjóri Rauðhóls.
Guðrún Sólveig leikskólastjóri Rauðhóls. Vísir/Vilhelm

„Leyndarmál Rauðhólsgleðinnar felur í sér að börn og starfsfólk fái tækifæri til að nýta eigin styrkleika og blómstra þannig í leik og starfi,“ segir Guðrún Sólveig leikskólastjóri Rauðhóls en Rauðhóll er einn þeirra vinnustaða sem nýtt hafa sér aðferðarfræði jákvæðrar sálfræði. Rauðhóll er einn stærsti leikskóli landsins. Þar eru starfræktar tíu deildir á þremur starfstöðvum. Starfsfólk er um sjötíu talsins og er samfélagsleg ábyrgð vinnustaðarins mikil áhersla í starfi skólans. „Við höfum lagt mikið á okkur að vera jákvætt afl í hverfinu okkar,“ segir Guðrún.

Í dag og á morgun fjallar Atvinnulífið á Vísi um það hvernig hægt er að nýta jákvæða sálfræði á tímum kórónufaraldurs. Í þessu öðru viðtali af þremur er rætt við Guðrúnu Sólveigu, sem meðal annars segir okkur frá þróunarverkefninu „ Leyndarmál Rauðhólsgleðinnar.“

Raða saman fólki sem passar saman

Með hvaða hætti hefur leikskólinn nýtt sér jákvæða sálfræði í stjórnun og starfi?

„Ég hef ávallt haft trú á einstaklingnum og unnið í styrkleikum starfsmanna. Hjálpað þeim að vinna í þeim og fundið bjargir til þess að styrkja þá. 

Fólkið okkar vinnur í teymum og erum við óhrædd við að breyta teymum og finna út með hvaða fólki viðkomandi blómstrar í starfi. 

Virkja alla og finna hlutverk fyrir alla skiptir miklu máli,“ segir Guðrún.

Að sögn Guðrúnar skiptir líðan starfsfólks ekki síst máli þegar mikil streita er í samfélaginu eins og nú er þegar áskoranirnar eru margar.

Í vinnuumhverfi okkar er ekki möguleiki á að vinna heima heldur verða allir að mæta daglega og ganga inn í kvíðann eða óttann sinn og takast á við hann. Við komum til móts við það ef einhverjir treysta sér ekki í vinnu vegna ótta tengdan covid-19 ástandinu. 

Það er mikilvægt að fólk geti viðurkennt og rætt saman um líðan sína og fengið jákvæða endurgjöf frá samstarfsfólki sínu. Á Rauðhóli ríkir skilningur á að fólk er eins mismunandi og það er margt, segir Guðrún og ó vel að mikilvægt er að hlúa vel að starfsfólki og vera vakandi yfir því hvernig fólki líður. 

„Það þarf að gefa mikið af sér í svona nánu starfi með börnum og er það erfitt ef fólki líður ekki vel,“ segir Guðrún.

Húmor og gleði mikilvæg

Til að vel takist til segir Guðrún stjórnendur þurfa að vinna jafnt og þétt að því að jákvæður andi ríki á vinnustaðnum. Í þeirri vinnu felist mikil ábyrgð. Starfsfólk þurfi líka að vita hversu mikilvægt það er.„Fólk verður að finna að á það sé hlustað og skoðanir þeirra og vangaveltur hafi gildi,“ segir Guðrún.

Á Rauðhóli er lausnamiðuð hugsun ríkjandi á vinnustaðnum þar sem teymi hika ekki við að „stökkva“ á lausnir. Gleðin skiptir líka miklu máli.

Húmor og gleði er mjög stór þáttur í starfsandanum og enn og aftur hafa stjórnendur mikið um það að segja. Að hafa húmor fyrir sjálfum sér er góður eiginleiki og höfum við nóg af honum,“ 

segir Guðrún.

Þróunarverkefnið „Leyndarmál Rauðhólsgleðinnar“ er dæmi um verkefni þar sem innleidd var aðferðarfræði jákvæðrar sálfræði. Markmið verkefnisins var að styrkja og þróa starfshætti leikskólans með því að innleiða aðferðafræði sálfræðingsins Mihaly Csikszentmihaly um flæði (e.flow).

„Starfsfólk Rauðhóls hélt ráðstefnu um flæði haustið 2018. En hjá okkur starfar ungverskur kennari sem setti sig í samband við Mihaly Csikszentmihaly og bauð honum til landsins. Mihaly er einn af frumkvöðlum jákvæðrar sálfræði í heiminum,“ segir Guðrún um upphafið að verkefninu.

Um þetta má betur læra af heimasíðu um flæði sem var útbúin sérsérstaklega með fjölbreyttu efni tengt hugmyndafræðinni, sjá nánar hér.

Hver finnst þér vera helsti ávinningurinn?

Þetta hefur leitt af sér að leikskólinn hefur laðað að sér hæfileikaríkt og metnaðarfullt starfsfólk,“ segir Guðrún


Tengdar fréttir

Tilfinningagreind eftirsótt hjá starfsmönnum framtíðarinnar

Nýjum kynslóðum á vinnumarkaði finnst eðlilegt að ræða tilfinningar og tilfinningagreind er eitt af því sem er alltaf að taka meira og meira pláss er meðal þess sem Guðrún Snorradóttir segir um hvers vegna tilfinningagreind skiptir miklu máli.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.