Körfubolti

Tileinkaði Kobe titilinn: „Veit að hann er stoltur af okkur“

Ingvi Þór Sæmundsson skrifar
Anthony Davis varð meistari á sínu fyrsta tímabili með Los Angeles Lakers.
Anthony Davis varð meistari á sínu fyrsta tímabili með Los Angeles Lakers. getty/Douglas P. DeFelice

Anthony Davis tileinkaði Kobe Bryant heitnum NBA-meistaratitilinn sem Los Angeles Lakers vann í nótt.

Lakers sigraði Miami Heat, 106-93, í nótt og tryggði sér þar með sigur í úrslitaeinvíginu, 4-2. Þetta er fyrsti meistaratitilinn Lakers síðan 2010 þegar Kobe var aðalmaðurinn í liðinu. Kobe og dóttir hans, Gianna, fórust í þyrluslysi í janúar á þessu ári.

„Allt frá harmleiknum vildum við gera þetta fyrir hann og við brugðumst honum ekki,“ sagði Davis eftir leikinn í nótt.

Lakers lék í sérstökum „Black Mamba“ búningi sem Kobe hannaði í fimmta leiknum í úrslitunum sem Miami vann.

„Það hefði verið frábært að klára þetta í síðasta leik í treyjunni hans. Í staðinn vorum við enn ákveðnari og kröftugri á báðum endum vallarins og kláruðum dæmið,“ sagði Davis.

„Ég veit að hann [Kobe] er stoltur af okkur. Vanessa [Bryant, ekkja Kobes] er stolt af okkur, félagið er stolt af okkur. Þetta skiptir miklu máli.“

Davis skoraði nítján stig og tók fimmtán fráköst í leiknum í nótt. Hann kom til Lakers frá New Orleans Pelicans í fyrra og varð meistari á sínu fyrsta tímabili með Kaliforníuliðinu.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.