Verðbólga ekki meiri í sextán mánuði

Heimir Már Pétursson skrifar 29. september 2020 12:18

Verðbólga mælist nú 3,5 prósent eða prósentustigi hærri en verðbólgumarkmið Seðlabanka Íslands. Vísir/Vilhelm

Verðbólga mælist nú 3,5 prósent og er yfir verðbólgumarkmiðum Seðlabanka Íslands þriðja mánuðinn í röð og fer vaxandi. Verðbólgan hefur ekki mælst jafn mikil í sextán mánuði.

Markmið Seðlabanka Íslands er að verðbólga sé ekki meiri en 2,5 prósent og það markmið náðist í desember í fyrra þegar hún fór í tvö prósent eftir að hafa verið yfir markmiðinu í um níu mánuði. Verðbólga var síðan undir markmiði bankans allt frá desember fram í maí á þessu ári þegar hún fór í 2,6 prósent og hélst þannig í júní.

Peningastefnunefnd kynnir ákvörðun í vaxtamálum á miðvikudag í næstu viku. Hingað til hefur Ásgeir Jónsson seðlabankastjóri ekki haft miklar áhyggjur af verðbólgunni.Vísir/Vilhelm

Verðbólga fór síðan í þrjú prósent í júlí, 3,2 prósent í ágúst og nú í september mælist hún 3,5 prósent og hefur ekki verið meiri síðan í maí í fyrra.

Athygli vekur að vísitala neysluverðs hefur hækkað minna síðustu tólf mánuði með húsnæðisliðinn innanborðs eða um 3,5% eins og áður sagði en án hans hefur vísitala neysluverðs hækkað um 3,9%. Það bendir til að þróun húsnæðisverðs hafi dregið úr verðbólgunni undanfarið ár. Næsti vaxtaákvörðunardagur Seðlabankans er á miðvikudag í næstu viku hinn 7. október.

Efnahagsmál Seðlabankinn

Tengdar fréttir

Verðbólga eykst enn á milli mánaða

Tólf mánaða verðbólga mælist nú 3,5% og eykst um 0,39% á milli mánaða.

29. september 2020 10:23

Stýrivextir haldast óbreyttir<br><br>

Meginvextir bankans, vextir á sjö daga bundnum innlánum, verða því áfram 1%.

26. ágúst 2020 09:05

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.