Fimm liggja inni á Landspítalanum með Covid-19 og hefur þannig einn bæst í þann hóp síðan í gær. Einn af sjúklingunum fimm er á gjörgæslu eftir sem áður. Fólkið sem liggur inni á spítalanum er á breiðu aldursbili; frá þrítugsaldri til sjötugsaldurs. Þetta kom fram í máli Þórólfs Guðnasonar sóttvarnalæknis á upplýsingafundi almannavarna vegna kórónuveirunnar nú síðdegis. 

Þórólfur sagði að það væri áhyggjuefni að fleiri væru nú að leggjast inn á spítala með kórónuveiruna. Þetta væri hins vegar ekki óviðbúið þar sem alvarleg veikindi komi yfirleitt upp um viku eftir smit. Búast mætti við því að toppi alvarlegra veikinda í þessari bylgju yrði náð á næstu dögum.